తిరుమల: గురువారం 67వేల మంది దర్శనం, ఆగస్టు షెడ్యూల్ విడుదల

తిరుమలలో భక్తుల రద్దీ భారీగా పెరిగింది. వైకుంఠం క్యూ కాంప్లెక్స్ దాటి నారాయణగిరి షెడ్లు, శిలాతోరణం వరకు క్యూ లైన్ విస్తరించింది. గురువారం 67వేల మందికి పైగా భక్తులు స్వామివారిని దర్శించుకున్నారు.

టోకెన్లు లేని భక్తులకు సర్వదర్శనానికి 18 నుంచి 20 గంటలు, రూ.300 ప్రత్యేక ప్రవేశ దర్శనానికి నాలుగు గంటలు, సర్వదర్శనం టోకెన్ ఉన్నవారికి ఆరు గంటల సమయం పడుతుందని TTD అధికారులు తెలిపారు. భక్తుల కానుకల రూపంలో TTD కి రూ.4.81 కోట్ల ఆదాయం వచ్చింది.

TTD ఆగస్టు నెలలో జరిగే విశేష పర్వదినాల వివరాలను ప్రకటించింది. ఆగస్టు 17న గరుడ పంచమి సందర్భంగా శ్రీవారి గరుడ వాహన సేవ జరగనుంది. 22 నుంచి 25 వరకు పవిత్రోత్సవాలు నిర్వహిస్తారు. 28న శ్రావణ పౌర్ణమి రోజున మరో గరుడ వాహన సేవ ఉంటుంది. 29న శ్రీవారు విఖనసాచార్యుల సన్నిధికి వేంచేపు చేస్తారు.