తిరుమల లడ్డు: 311 ఏళ్ళ ప్రసాద చరిత్ర, ఈ ఏడాది రికార్డు స్థాయిలో విక్రయాలు

తిరుమల తిరుపతి దేవస్థానం (టీటీడీ) లడ్డు విక్రయాల్లో సరికొత్త రికార్డు నమోదైంది. ఈ ఏడాది ఏప్రిల్ నుంచి జూలై వరకు గత నాలుగు నెలల్లో 4.88 కోట్ల లడ్డూలు విక్రయించినట్లు టీటీడీ గణాంకాలు చెబుతున్నాయి.

తిరుమల శ్రీ వెంకటేశ్వర స్వామికి లడ్డు ప్రసాదం 1715 ఆగస్టు 2 న ప్రారంభమైంది. దీంతో లడ్డు ప్రసాదానికి 311 ఏళ్ళు నిండాయి. ప్రారంభంలో బూంది రూపంలో ఉన్న నైవేద్యం, 1940 నాటికి ప్రస్తుత గుండ్రని లడ్డు రూపం పొందింది. 2009లో తిరుమల లడ్డుకు భౌగోళిక గుర్తింపు (GI Tag) లభించింది.

లడ్డు తయారీకి నాణ్యమైన శెనగపిండి, స్వచ్ఛమైన ఆవునెయ్యి, చక్కెర, జీడిపప్పు, కిస్మిస్, ఏలకులు, పచ్చ కర్పూరం వంటి పదార్థాలు వాడతారు. సాధారణ భక్తులకు ఇచ్చేది ప్రోక్తం లడ్డు, ప్రత్యేక ఉత్సవాలకు ఆస్థానం లడ్డు, వివాహాలకు కళ్యాణోత్సవ లడ్డు అని మూడు రకాలు ఉన్నాయి.

ఈ ఏడాది వేసవిలో భక్తుల రద్దీ బాగా పెరగడంతో లడ్డు విక్రయాలు కూడా పెరిగాయి. ఏప్రిల్‌లో 1.11 కోట్లు, మేలో 1.21 కోట్లు, జూన్‌లో 1.26 కోట్లు, జూలైలో 1.30 కోట్ల లడ్డూలు విక్రయమయ్యాయి. కిందటి సంవత్సరాలతో పోలిస్తే ఇది కొత్త రికార్డు. ప్రస్తుతం రోజుకు సుమారు 4.5 లక్షల లడ్డూలు విక్రయిస్తున్నారు.

తిరుమలలో శుక్రవారం (ఆగస్టు 7) 75,500 మందికి పైగా భక్తులు స్వామి దర్శనం చేసుకున్నారు. 35,551 మంది తలనీలాలు సమర్పించారు. హుండీ ఆదాయం 3.81 కోట్ల రూపాయలు. టోకెన్ లేని భక్తులకు 18 గంటల వరకు దర్శన సమయం పట్టింది. రూ.300 టికెట్ ఉన్న వారికి 6 గంటలు, సర్వదర్శన టోకెన్ ఉన్నవారికి 8 గంటల సమయం అవసరమని టీటీడీ అధికారులు తెలిపారు.