తిరుమల శ్రీవారికి మట్టికుండల్లో నైవేద్యం: 1980ల వరకు సంప్రదాయం

తిరుమల శ్రీవారి ఆలయంలో మట్టికుండలలో ప్రసాదాలను నివేదించే సంప్రదాయం 1980ల వరకు అమలులో ఉందని ఆలయ రికార్డులు తెలియజేస్తున్నాయి. సవాల్ జవాబ్ కైంకర్య పట్టి అనే రికార్డులో ఈ వివరాలు నమోదయ్యాయి.

ఈ రికార్డుల ప్రకారం తిరుపతిలో ఉన్న కుమ్మరి దేవస్థానానికి అవసరమైన మట్టికుండలు సరఫరా చేసేవారు. రెండో పత్రంలో కుమ్మర గురువప్ప అనే వ్యక్తి తిరుమల తిరుపతి, రామస్వామి దేవాలయాలకు మట్టి పాత్రలు అందించినట్టు ఉంది. పెద్ద కుండలు తయారు చేసే పని కూడా ఉండేది.

వైఖానస ఆగమం ప్రకారం నైవేద్యపు పాత్రలు బంగారు, వెండి, రాగి, కంచు, మట్టితో ఉండవచ్చు. కాలక్రమంలో ప్రసాదాల తయారీ పెరగడంతో మట్టికుండల స్థానంలో వెండి, కంచు పాత్రలు వాడుతున్నారు. ప్రస్తుతం నిత్య నివేదనలు ఆగమ శాస్త్రం ప్రకారమే సమర్పిస్తున్నారు.