తిరుమలలో వైకుంఠం క్యూ కాంప్లెక్స్ భక్తులతో నిండింది; సర్వదర్శనానికి 18 గంటలకు పైగా సమయం

తిరుమలలో వైకుంఠం క్యూ కాంప్లెక్స్ భక్తులతో పూర్తిగా నిండిపోయింది. సోమ, మంగళవారాల్లో సుమారు 79,000 మంది శ్రీవారిని దర్శించుకున్నారు. కొత్తగా వచ్చిన భక్తులతో క్యూ కాంప్లెక్స్ మొత్తం నిండిందని అధికారులు తెలిపారు. భక్తులు సమర్పించిన హుండీ కానుకల ద్వారా టీటీడీకి రూ. 4.72 కోట్ల ఆదాయం వచ్చింది.

బుధవారం ఉదయానికి భక్తుల క్యూ లైన్లు నారాయణగిరి షెడ్లు దాటి శిలాతోరణం వరకు విస్తరించాయి. సర్వదర్శనానికి 18 గంటలకు పైగా సమయం పడుతోందని టీటీడీ ప్రకటించింది. రూ. 300 టికెట్ దర్శనానికి 5 గంటలు, సర్వదర్శనం టోకెన్లు పొందిన భక్తులకు 7 గంటలు సమయం పడుతోంది.

సెప్టెంబర్ రెండవ పక్షం నుండి భక్తుల రద్దీ మరింత పెరిగే అవకాశం ఉంది. సెప్టెంబర్ 15 నుంచి 23 వరకు శ్రీవారి సాలకట్ల బ్రహ్మోత్సవాలు జరుగుతాయి. ఈ సందర్భంగా తొమ్మిది రోజుల పాటు అష్టదళ పాదపద్మారాధన, కళ్యాణోత్సవం, ఉంజల్ సేవ తదితర ఆర్జిత సేవలను టీటీడీ రద్దు చేసింది. వృద్ధులు, దివ్యాంగులు, చంటిపిల్లల తల్లిదండ్రులు, ఎన్ఆర్ఐ దాతల దర్శనాలను కూడా రద్దు చేసినట్టు ప్రకటించింది.

కాగా, హైదరాబాద్ కి చెందిన ట్రినిటీ కంబైన్డ్ సంస్థ ప్రతినిధులు శ్రీవారిని దర్శించుకొని, టీటీడీ ప్రాణదాన పథకానికి రూ. 2 కోట్ల విరాళం అందించారు. ఈ విరాళాన్ని అదనపు ఈఓ వెంకయ్య చౌదరికి ఆలయంలోని రంగనాయకుల మండపంలో అందజేశారు.