2036 నాటికి $1.5 ట్రిలియన్ ఆర్థిక వ్యవస్థ లక్ష్యంగా తమిళనాడు బడ్జెట్‌లో సంచలన ప్రకటనలు

తమిళనాడు ముఖ్యమంత్రి విజయ్ 2026–27 ఆర్థిక సంవత్సరానికి తన ప్రభుత్వ తొలి బడ్జెట్‌ను సమర్పించారు. 2036 నాటికి రాష్ట్ర ఆర్థిక వ్యవస్థ 1.5 ట్రిలియన్ డాలర్లకు చేర్చాలనే లక్ష్యంతో భారీ నిధులు కేటాయించారు.

విద్యారంగంలో ప్రభుత్వ పాఠశాలల ఆధునికీకరణకు రూ.2132 కోట్లు, ‘సూపర్ క్లీన్ సూపర్ క్యాంపస్’ పథకానికి రూ.139 కోట్లు, విద్యార్థులకు సైకిళ్ల పంపిణీకి రూ.277 కోట్లు కేటాయించారు. కళాశాల విద్యార్థులకు ల్యాప్‌టాప్‌లు అందించే ‘వెట్రి ల్యాప్‌టాప్’ పథకానికి రూ.2000 కోట్లు నిధులు ఇచ్చారు.

వైద్య రంగంలో ప్రసూతి సేవల కోసం ‘తాయ్‌మామన్ తంగ మోదిరమ్’ పథకం కింద ప్రభుత్వాసుపత్రుల్లో జన్మించే ప్రతి శిశువు కుటుంబానికి గ్రాము బంగారు ఉంగరం బహుమతిగా అందించనున్నారు. టెలిమెడిసిన్ నెట్‌వర్క్‌కు రూ.18.5 కోట్లు, మొబైల్ వృద్ధుల చికిత్సా కేంద్రాలకు రూ.33 కోట్లు కేటాయించారు.

రైతులకు సహకార బ్యాంకుల పంట రుణాలను రూ.5932 కోట్లతో పూర్తిగా మాఫీ చేయనున్నట్లు ప్రకటించారు. చేపల వేట నిషేధ కాలంలో చేపట్టే మత్స్యకారుల భృతిని రూ.6000 నుంచి రూ.7000కు పెంచారు. మహిళా సాధికారత కోసం వివాహ సమయంలో 8 గ్రాముల బంగారు నాణెం, పట్టు చీర కానుకగా ఇవ్వనున్నారు.

పారిశ్రామిక వృద్ధికి తూత్తుకుడి-తిరునెల్వేలి జిల్లాలను ‘స్పేస్ సిటీ’గా అభివృద్ధి చేయనున్నారు. ‘అరివగం’ పేరుతో ఏఐ నగరం నిర్మాణం, వ్యాపార సులభతరం కోసం ‘వళికాట్టి 3.0’ పెట్టుబడి సింగిల్ విండో పోర్టల్‌ను ప్రవేశపెట్టారు. రాష్ట్ర రుణభారం తగ్గించి ఆదాయ వనరులను పెంచేందుకు రెవెన్యూ ఆగ్మెంటేషన్ కమిటీని ఏర్పాటు చేశారు.