టాలీవుడ్ టికెట్ రేట్ల వివాదం: కొత్త కమిటీ ఏర్పాటు, పాత కమిటీ రద్దు

టాలీవుడ్‌లో టికెట్ ధరలు, లాభాల పంపకాల వివాదం మళ్లీ తెరపైకి వచ్చింది. పాత కమిటీని రద్దు చేసిన ఫిల్మ్ ఛాంబర్, కొత్త కమిటీని ఏర్పాటు చేసింది.

నిర్మాత కేఎల్ నారాయణ అధ్యక్షతన ఏర్పడిన ఈ కమిటీలో చెదలవాడ శ్రీనివాసరావు, భరత్ భూషణ్, ప్రసన్న కుమార్, సునీల్ నార, మైత్రీ మూవీస్ నుంచి నవీన్ యర్నేని లేదా రవి, సితార ఎంటర్టైన్మెంట్స్ నుంచి నాగవంశి తదితరులు సభ్యులుగా ఉన్నారు. ఇప్పటికే ఈ కమిటీ తొలి సమావేశం జరిపింది.

థియేటర్ యజమానులు టికెట్ల బుకింగ్ శాతం ఆధారంగా (ఆక్యుపెన్సీ బట్టి) పర్సెంటేజీ ఇవ్వాలని డిమాండ్ చేస్తున్నారు. ముఖ్యంగా సింగిల్ థియేటర్ల విషయంలో ఈ సమస్య తీవ్రంగా ఉంది. నిర్మాతలు మాత్రం మొదటి వారం పర్సెంటేజీ ఇస్తే తమకు భారీ నష్టం సంభవిస్తుందని వాదిస్తున్నారు.

గతంలో జూలై 31 గడువుతో ఏర్పాటైన పాత కమిటీ ఈ వివాదాన్ని పరిష్కరించలేదు. ఈ కారణంగా కొత్త కమిటీకి ఎలాంటి సమయపాలనా విధించకుండా, వీలైనంత త్వరగా నివేదిక ఇవ్వాలని ఛాంబర్ ఆదేశించింది.