విస్కాన్సిన్ లో తుఫాను విధ్వంసం: పలు ఇళ్లు ధ్వంసం, కర్ఫ్యూ విధింపు

అమెరికాలోని విస్కాన్సిన్ రాష్ట్రంలోని మెనాషా నగరంలో సంభవించిన శక్తివంతమైన తుఫాను (tornado) కారణంగా పలు ఇళ్లు నేలమట్టమయ్యాయి. ఈ ఘటనలో గాయపడిన వారి సంఖ్య అధికారులు వెల్లడించలేదు. తుఫాను రాకముందే భారీ శబ్దాలు వచ్చాయని, సైరన్ మోగగానే ప్రజలు నేలమాళిగల్లోకి తరలివెళ్లారని ప్రత్యక్ష సాక్షులు తెలిపారు.

ఒక స్థానిక నివాసి మాట్లాడుతూ, 'వందేళ్ల వయసున్న చెట్టు విరిగి గ్యారేజీపై పడింది. నేలమాళిగ నుంచి పైకి వచ్చాక యుద్ధం జరిగినంత విధ్వంసం కనిపించింది' అని చెప్పాడు. మరో నివాసి, 'చెవులు ఇలా ఒత్తిడితో మూసుకుపోయినట్టు, విమానంలో ఉన్నట్టు అనిపించింది. చాలా తీవ్రంగా ఉంది' అని వివరించాడు.

విధ్వంసం తర్వాత అధికారులు అప్రమత్తమై, ప్రభావిత ప్రాంతాలకు ప్రవేశంపై ఆంక్షలు పెట్టారు. మెనాషా నగరంలో రాత్రి 10 నుంచి ఉదయం 5 గంటల వరకు కర్ఫ్యూ అమలవుతుందని ప్రకటించారు. ఫాక్స్ క్రాసింగ్ యుటిలిటీస్ ప్రాంతంలో నీటి పీడనం తగ్గిన కారణంగా, తాగునీటికి మరిగించాలని సూచించారు. కనీసం ఒక నిమిషం మరిగించిన తర్వాత మాత్రమే నీరు తాగాలని, స్నానం, లాండ్రీలకు వాడొచ్చని అధికారులు చెప్పారు. అత్యవసర సమయాల్లో బాటిల్ వాటర్ వాడాలని కోరారు.