టయోటా హైలక్స్ 2025 ఫేస్‌లిఫ్ట్ లాంచ్: ‘సైబర్ సుమో’ డిజైన్, ఆఫ్‌రోడ్ సామర్థ్యం మెరుగుదల

టయోటా ఇండియా తన ప్రీమియం పికప్ ట్రక్ హైలక్స్ కొత్త తరం ఫేస్‌లిఫ్ట్ మోడల్‌ను భారత మార్కెట్‌లో విడుదల చేసింది. ఈ మోడల్‌కు ‘సైబర్ సుమో’ అనే కొత్త డిజైన్ కాన్సెప్ట్‌తో పూర్తిగా రీడిజైన్ చేసిన బాహ్య రూపాన్ని ఇచ్చారు. టయోటా ఇండియా డిప్యూటీ మేనేజింగ్ డైరెక్టర్ అసజుమా సాన్ ఈ వివరాలు వెల్లడించారు.

కొత్త హైలక్స్ బాహ్యంగా పూర్తి స్థాయిలో మార్పు చెందింది. ‘సుమో రెజ్లర్’ బలం, దృఢత్వం నుంచి ప్రేరణ పొందిన ఈ డిజైన్, వాహనాన్ని మరింత ఆకర్షణీయంగా తీర్చిదిద్దింది. ఇంటీరియర్ కూడా పూర్తిగా కొత్తగా రూపొందించారు. ప్లాట్‌ఫామ్ సహా అనేక సాంకేతిక అంశాల్లో అప్‌గ్రేడ్‌లు జరిగాయి.

డిప్యూటీ MD మాట్లాడుతూ, “పాత హైలక్స్ కస్టమర్ల నుంచి వచ్చిన ఫీడ్‌బ్యాక్ ప్రకారం, ఆఫ్‌రోడ్ సామర్థ్యాన్ని మెరుగుపరచడంపై ఎక్కువగా దృష్టి పెట్టాం. లేహ్-లడఖ్ వంటి పర్వత ప్రాంతాలు, మంచు కురిసే ప్రదేశాల్లో వినోద యాత్రలకు వినియోగించే వారి అవసరాలను దృష్టిలో ఉంచుకుని డ్రైవబిలిటీ, సస్పెన్షన్‌ను మెరుగుపరిచాం. హైలక్స్‌కు 50 ఏళ్ల చరిత్ర ఉంది, ప్రతి తరంలోనూ మార్పులు చేస్తూ వస్తున్నాం. ఈ కొత్త తరం మరింత మెరుగైన స్థాయికి చేరింది” అని వివరించారు.

పాత మోడల్‌తో పోలిస్తే కొత్త మోడల్‌లో చిన్న చిన్న అభిప్రాయాలనూ పరిగణలోకి తీసుకున్నట్లు అసజుమా సాన్ తెలిపారు. దీంతో ఆఫ్‌రోడ్ ప్రియులకు మరింత సౌకర్యవంతమైన డ్రైవింగ్ అనుభవం లభించనుంది. కొత్త హైలక్స్ ధరలు, లభ్యత త్వరలో అధికారికంగా ప్రకటించనున్నారు.