కార్తీక శుక్ల తదియ రోజు త్రిలోచన గౌరీ వ్రతం: పూజా విధానం, మంత్రం వివరాలు

కార్తీక మాసం శుక్ల పక్షంలో వచ్చే తదియ తిథి రోజున త్రిలోచన గౌరీ వ్రతం ఆచరిస్తారు. ఈ రోజు గౌరీదేవిని పూజిస్తే సంపూర్ణ అనుగ్రహం లభిస్తుందని ధర్మశాస్త్ర గ్రంథాలు తెలియజేస్తున్నాయి.

పూజలో తమలపాకు మీద పసుపు ముద్దను ఉంచుతారు. దానికి ఎడమ, కుడి వైపులా కుంకుమ బొట్లు పెడతారు. దీన్ని గౌరీ స్వరూపంగా భావిస్తారు. గౌరీ అష్టోత్తరం చదువుతూ పూలు, అక్షింతలతో పూజ చేస్తారు. రకరకాల నైవేద్యాలు సమర్పిస్తారు. పరమేశ్వరుడికి అభిషేకం కూడా నిర్వహిస్తారు.

ఈ వ్రతానికి ఒక ప్రత్యేకత ఉంది. కార్తీక శుక్ల తదియ రోజు కైలాసంలో పార్వతీ పరమేశ్వరులు అర్ధనారీశ్వర రూపంలో ఉంటారని పౌరాణిక గ్రంథాలు చెప్తున్నాయి. ఆ సమయంలో దేవతలు రాక్షస బాధ నుంచి కాపాడాలని ప్రార్థించారు. అర్ధనారీశ్వరుల మూడో నేత్రం నుంచి అగ్నిజ్వాల బయటకు వచ్చి రాక్షస సంహారం చేసిందని గ్రంథాలు తెలుపుతున్నాయి. అందుకే ఈ రోజు గౌరీదేవిని, శివుణ్ణి పూజిస్తారు.

పూజ చేయలేని వారు దీపారాధన చేసి ఒక మంత్రాన్ని 21 సార్లు జపించవచ్చు. ఆ మంత్రం: ఓం త్రిలోచనాయై చ విద్మహే మహాశక్త్యై చ ధీమహి తన్నో గౌరీ ప్రచోదయాత్.

కార్తీక మాసంలో స్నానానికి ప్రధాన్యత ఉంది. సూర్యోదయానికి ముందే స్నానం చేయాలని స్కాంద పురాణం, తులా పురాణం చెప్తున్నాయి. సూర్యుడు తులా రాశిలో ఉన్నప్పుడు గంగాదేవి అన్ని నదీ జలాల్లో ఉంటుందని ఆ గ్రంథాల్లోని శ్లోకం తెలుపుతోంది. అందుకే కార్తీకంలో ఎక్కడ స్నానం చేసినా గంగా స్నాన ఫలితం లభిస్తుందని భావిస్తారు. ఆవుపాదమంత నీటిలో కూడా విష్ణువు కృషీకేశుడిగా ఉంటాడని పేర్కొంటారు.

స్నానం చేయలేని వారికి స్కాంద పురాణం వైష్ణవ ఖండంలో ఒక ఉపాయం చెప్పారు. కార్తీక మాసంలో కావేరీ నదిలో స్నానం చేస్తున్నాను అని మనసులో భావించినా సరిపోతుందని ఆ శ్లోకం చెప్తోంది. దీని వల్ల పాపాలు తొలిగిపోయి విష్ణు లోకం లభిస్తుందని గ్రంథాలు తెలుపుతున్నాయి.