ఇరాన్‌పై యుద్ధం అద్భుత విజయం, ఇరాన్‌కు అణ్వాయుధాలు ఎన్నడూ లభించవని ట్రంప్ స్పష్టీకరణ

అమెరికా అధ్యక్షుడు డొనాల్డ్ ట్రంప్ ఇరాన్‌పై సాగిస్తున్న సైనిక చర్యను అద్భుత విజయంగా అభివర్ణించారు. ఇక నుంచి ఇరాన్ ఎట్టి పరిస్థితుల్లోనూ అణ్వాయుధాలను సాధించలేదని ఆయన నొక్కి చెప్పారు. ఒక మీడియా సమావేశంలో మాట్లాడుతూ ట్రంప్ ఈ వ్యాఖ్యలు చేశారు. ఇరాన్‌ను అణురహితం చేయడమే తమ లక్ష్యమని, అది ఇప్పుడు సాధ్యమైందని పేర్కొన్నారు. గ్రానైట్ పర్వతం కింద ఉన్న అణు సామగ్రి ఇప్పుడు కుప్పకూలిందని, దాన్ని బయటకు తీయడానికి నెలల సమయం పడుతుందని ఆయన వివరించారు.

ట్రంప్ ప్రకారం ఇరాన్ సైనిక శక్తి పూర్తిగా నాశనమైంది. వైమానిక దళం, 159 యుద్ధ నౌకలు సముద్రంలో మునిగిపోయాయి. రాడార్ వ్యవస్థలు, వైమానిక రక్షణ పరికరాలన్నీ ధ్వంసమయ్యాయి. దేశంలో ద్రవ్యోల్బణం 350 శాతానికి చేరుకుంది. యుద్ధం ప్రారంభంలో ఇది 5-6 శాతంగా ఉండేది. చమురు ధరలు తాను బాధ్యతలు చేపట్టినప్పటి కంటే తక్కువగా ఉన్నాయన్నారు.

ఇరాన్ ఒప్పందం కోసం ప్రయత్నిస్తోందని, కానీ ఎలా చేయాలో తెలియడం లేదని ట్రంప్ విమర్శించారు. రాత్రిపూట నౌకలపై కాల్పులు జరపడం తనకు నచ్చలేదన్నారు. ఇరాన్ నాయకత్వాన్ని 'కాస్త loco' (పిచ్చి) అని, వారు 'scum' (నీచులు) అని దుర్భాషలాడారు. ఖమేనీని ఎన్నో హత్యలకు కారణమైన వ్యక్తిగా అభివర్ణించారు. ఇరాన్ వర్గాలు ఒక అంత్యక్రియలకు హాజరు కావాలని కోరినట్లు తెలిపారు.

ఇరాన్ 47 ఏళ్లుగా మధ్యప్రాచ్యంలో బెదిరింపులకు పాల్పడుతోందని, కానీ ఇప్పుడు పూర్తి భిన్నమైన దేశంగా మారిందని ట్రంప్ అన్నారు. తాను వారి ప్రధాన లక్ష్యమని, అది అందరికీ తెలిసిన విషయమని, ఇరానీయులు నీచంగా ప్రవర్తిస్తున్నారని మండిపడ్డారు.