ఇరాన్‌పై దాడులు తాత్కాలికంగా నిలిపివేత: ట్రంప్ ప్రకటన

ఇరాన్‌పై దాడులను తాత్కాలికంగా నిలిపివేస్తున్నట్లు అమెరికా అధ్యక్షుడు డొనాల్డ్ ట్రంప్ ప్రకటించారు. పశ్చిమాసియాలోని మిత్రదేశాలతో శాంతి ఒప్పందంపై అవగాహనకు వచ్చిన నేపథ్యంలో ఈ నిర్ణయం తీసుకున్నట్లు ఆయన సోషల్ మీడియా ద్వారా తెలిపారు.

యుద్ధం శాశ్వతంగా ముగియడానికి కుదిరే ఒప్పందంలో హార్మోజ్ జలసంధిని పూర్తిగా తెరవడం, ఇరాన్ అణు బెదిరింపులకు ముగింపు వంటి అంశాలు ఉంటాయని ట్రంప్ చెప్పారు. ఒప్పందం ఖరారు కాకపోతే మళ్లీ దాడులు చేస్తామని హెచ్చరించారు. ప్రపంచ యుద్ధం తర్వాత ఎన్నడూ చూడని స్థాయిలో సైనిక శక్తితో దాడి చేసేందుకు అమెరికా సన్నద్ధంగా ఉన్నా, శాంతి కోసం దాడులు నిలిపివేస్తున్నామని ఆయన స్పష్టం చేశారు.

ఇరాన్ మాత్రం అమెరికా చర్యలను వ్యతిరేకిస్తూ, ఈ వారాంతంలో దాడులు జరిపితే తీవ్ర ప్రతీకారం తీసుకుంటామని హెచ్చరించింది. సౌదీ అరేబియా, యూఏఈ లోని చమురు క్షేత్రాలు, ఖతార్, ఇజ్రాయిల్ లోని గ్యాస్ క్షేత్రాలను ధ్వంసం చేస్తామని బెదిరించింది.

ఈ నేపథ్యంలో, ఒప్పందం కోసం ఖతార్, పాకిస్థాన్ దేశాలు విడివిడిగా అమెరికా, ఇరాన్ ప్రతినిధులతో చర్చలు జరుపుతున్నట్లు అంతర్జాతీయ మీడియా వెల్లడించింది. ట్రంప్ ప్రకటన తర్వాత అమెరికా-ఇరాన్ మధ్య చర్చలు పునరుజ్జీవనం పొందే అవకాశాలు కనిపిస్తున్నాయి.

చర్చల్లో హార్మోజ్ సంధిని పూర్తిగా తెరవడం, పశ్చిమాసియా అంతటా దాడులు నిలిపివేయడం వంటి డిమాండ్లను అమెరికా బలంగా వినిపించనుంది. దీనికి బదులుగా, ఇరాన్ పై నౌకాదళ దిగ్బంధాన్ని ఉపసంహరించుకోవడం, చమురు ఎగుమతులకు అనుమతించడం వంటి హామీలను ఇచ్చే అవకాశం ఉంది.

ఇరాన్ విదేశాంగ శాఖ ప్రతినిధి ఇస్మాయిల్ బఘాయీ మాట్లాడుతూ, హార్మోజ్ పరిస్థితి యుద్ధానికి ముందు మాదిరిగా ఉండబోదని, ఒమెన్‌తో జరుపుతున్న చర్చలు తుది దశకు చేరుకున్నాయని స్పష్టం చేశారు.