Iran శాంతి ఒప్పందంపై ట్రంప్ కీలక ప్రకటన: జలసంధి తెరుచుకోనుంది, శని లేదా సోమవారం సంతకం

అమెరికా అధ్యక్షుడు డొనాల్డ్ ట్రంప్ ఇరాన్‌తో శాంతి ఒప్పందంపై కీలక అప్‌డేట్ ఇచ్చారు. హార్ముజ్ జలసంధిని వెంటనే తెరుస్తామని, ఒప్పందంపై సంతకం శనివారం లేదా సోమవారం నాటికి జరగొచ్చని ఆయన ప్రకటించారు. ఇది ఒకే ఒక సంతకం ప్రక్రియ అని, త్వరగా పూర్తవుతుందనే నమ్మకం ఉందన్నారు. ఒప్పందానికి గడువు ఏమీ లేదని, కానీ అది తప్పక జరుగుతుందనే ధీమా వ్యక్తం చేశారు. ట్రంప్ ఆసక్తికర విషయం వెల్లడించారు: గత కొన్ని నెలలుగా తాము రహస్యంగా అనేక నౌకలను ఆ జలసంధి మీదుగా పంపించామని, దాదాపు వందల మిలియన్ల బారెల్స్ చమురు సరఫరా చేశామని చెప్పారు. ఈ విషయం ఎవరికీ తెలియలేదని, బహుశా తమ రహస్య ఆపరేషన్ విజయవంతమైందని వ్యాఖ్యానించారు. ఇరాన్ శాంతి ఒప్పందం కుదిరితే ప్రపంచ చమురు మార్కెట్‌కు భారీ ఊరట లభిస్తుంది. హార్ముజ్ జలసంధి ప్రపంచంలోని అత్యంత కీలక చమురు రవాణా మార్గం. భారత్‌లాంటి దేశాలు భారీగా ఇక్కడి నుంచే ముడి చమురు దిగుమతి చేసుకుంటాయి. ఒప్పందం అమల్లోకి వస్తే చమురు ధరలు స్థిరంగా ఉండే అవకాశం ఉంటుంది. తాజా ప్రకటనతో అంతర్జాతీయ చమురు మార్కెట్లు చైతన్యం పొందాయి. సంతకం ఎప్పుడు జరుగుతుందనే దానిపై అందరి దృష్టి నెలకొంది.