న్యూఢిల్లీ టీటీడీ ఆలయంలో వార్షిక పవిత్రోత్సవాలు శాస్త్రోక్తంగా ప్రారంభం

న్యూఢిల్లీలోని టీటీడీ శ్రీ వెంకటేశ్వర స్వామి ఆలయంలో వార్షిక పవిత్రోత్సవాలు జరుగుతున్నాయి. హస్తినాపుర క్షేత్రంగా పేరున్న ఈ ఆలయంలో శ్రీదేవి భూదేవి సమేత శ్రీ వెంకటేశ్వర స్వామి వారికి ఉత్సవాలు నిర్వహిస్తున్నారు.

ఉత్సవాల్లో భాగంగా అర్చకులు మహాపూర్ణాహుతి, చక్రస్నానం కార్యక్రమాలు శాస్త్రోక్తంగా చేశారు. శ్రీపాంచరాత్ర భగవత్ శాస్త్ర ప్రకారం ఉదయం పవిత్ర సమర్పణ జరిగింది. మహానివేదన హారతితో ఈ కార్యక్రమం ముగిసింది. అనంతరం లఘు పూర్ణాహుతి నిర్వహించారు. భక్తులు పెద్ద సంఖ్యలో తరలివచ్చి స్వామి వారిని దర్శించుకున్నారు.

ఆలయంలో నిత్యం జరిగే అర్చనలు, ఆర్చిత సేవలు, వారోత్సవాలు, పక్షోత్సవాలు, మాసోత్సవాలు, బ్రహ్మోత్సవాల సమయంలో తెలియక జరిగే దోషాల నివారణ కోసం పవిత్రోత్సవాలు నిర్వహించడం ఆనవాయితీగా ఉంది. ఈ సంప్రదాయం ప్రకారమే ఈసారి ఉత్సవాలు జరుగుతున్నాయి.

సోమవారం సాయంత్రం స్వామి వారి తిరుచ్చి ఉత్సవం నాలుగు మాడవీధుల్లో జరగనుంది. రేపు పవిత్ర వితరణ కార్యక్రమం ఉంటుంది. అనంతరం స్వామి వారికి పంచామృతాలతో అభిషేకం నిర్వహిస్తారు.