తిరుమలలో 38 వీధులకు పవిత్ర నామాలు: టీటీడీ కీలక నిర్ణయం

తిరుమలలో టీటీడీ 38 వీధులకు కొత్త పేర్లు నిర్ణయించింది. వీటిలో నాలుగు మాడవీధులకు వేదాల పేర్లు పెట్టినట్లు టీటీడీ తెలిపింది. తూర్పు మాడవీధిని ఋగ్వేద మార్గంగా, దక్షిణ మాడవీధిని యజుర్వేద మార్గంగా, పడమర మాడవీధిని సామవేద మార్గంగా, ఉత్తర మాడవీధిని అధర్వన వేద మార్గంగా పేరు మార్చారు.

మిగతా 34 వీధులకు దేవుళ్లు, రాజులు, మహాభక్తుల పేర్లు పెట్టారు. గరుడాద్రి మార్గం, అంజనాద్రి మార్గం, అన్నమాచార్య మార్గం, కులశేఖర్ ఆల్వార్ల మార్గం, శ్రీకృష్ణదేవరాయ మార్గం, వెంగమాంబ మార్గం తదితర పేర్లు ఖరారు చేసినట్లు టీటీడీ అధికారులు తెలిపారు. త్వరలో ఈ కొత్త పేర్లతో బోర్డులు ఏర్పాటు చేస్తామన్నారు.

కొండపై భక్తులు నడిచే ప్రతి వీధి దేవుని స్మరణతో సాగాలనే లక్ష్యంతో ఈ పేర్ల మార్పు చేసినట్లు టీటీడీ వర్గాలు వెల్లడించాయి. భక్తులకు పుణ్యక్షేత్ర చరిత్ర తెలియడంతో పాటు భక్తి పెరుగుతుందని అధికారులు ఆశాభావం వ్యక్తం చేశారు.