తిరుమలలో 150 రోజులకు సరిపడ నీటి నిలువలు ఉన్నాయి: TTD చైర్మన్ సమీక్ష

తిరుమలలోని జలాశయాల్లో ప్రస్తుతం 150 రోజులకు సరిపడ నీటి నిలువలు ఉన్నాయని TTD అధికారులు తెలిపారు. టీటీడీ చైర్మన్ బీఆర్ నాయుడు అధికారులతో కలిసి తిరుమలలోని జలాశయాలను పరిశీలించారు. నీటి నిలువల పరిస్థితిపై సమీక్ష నిర్వహించారు.

తిరుమలలో రోజుకు సుమారు 50 లక్షల గ్యాలన్ల నీరు అవసరమవుతుందని అదనపు ఈఓ తెలిపారు. ప్రస్తుత నీటి నిలువల పరిస్థితిని సీఎం చంద్రబాబుకు తెలియజేసినట్లు ఆయన చెప్పారు. సీఎం ఆదేశాల మేరకు తదుపరి చర్యలు చేపడతామని అన్నారు.

భక్తులు నీటిని పొదుపుగా వాడేలా చర్యలు తీసుకుంటున్నట్లు అధికారులు తెలిపారు. భవిష్యత్తులో నీటి నిలువలు పెంచేందుకు ప్రణాళికలు సిద్ధం చేస్తున్నారు. వర్షాలు పడకపోతే ఏం చేయాలనే దానిపై అధికారులకు ప్రణాళికలు సిద్ధం చేయాలని సూచించినట్లు టీటీడీ చైర్మన్ తెలిపారు.

కళ్యాణ డామ్ నుంచి నీటిని తీసుకురావడం సహా ప్రత్యామ్నాయాలపై ఒక నివేదిక తయారవుతోందని ఆయన చెప్పారు. ఆ నివేదికను ప్రభుత్వానికి సమర్పించిన తర్వాత ప్రభుత్వం నిర్ణయం తీసుకుంటుందని అన్నారు. ఇటీవలి సమావేశంలోనూ ఈ విషయం సీఎం దృష్టికి తీసుకెళ్లినట్లు తెలిపారు.

వర్షాలు కురుస్తాయని, ఇబ్బంది ఉండదని సీఎం చంద్రబాబు ధీమా వ్యక్తం చేసినట్లు టీటీడీ చైర్మన్ తెలిపారు. వర్షాలు పడకపోతే ప్రత్యామ్నాయ చర్యలు యుద్ధ ప్రాతిపదికన చేపట్టాల్సి ఉంటుందని ఆయన అన్నారు.