తిరుమలలో అన్నప్రసాదాల పంపిణీకి మూవింగ్ టేబుల్ వ్యవస్థ ప్రయోగాత్మకంగా ప్రారంభం

తిరుమల శ్రీవారి దర్శనానికి వచ్చే భక్తుల క్యూ లైన్లలో అన్నప్రసాదాల పంపిణీని వేగవంతం చేసేందుకు టిటిడి కొత్త విధానాన్ని పరిశీలిస్తోంది.

ప్రస్తుతం తిరుమలలో ఆక్టోపస్ భవనం నుంచి కృష్ణతేజ గెస్ట్హౌస్ వరకు దాదాపు 3.5 కిలోమీటర్ల మేర క్యూ లైన్లు ఉంటాయి. ఉదయం 6 నుంచి రాత్రి 11 గంటల వరకు సుమారు 100 మంది శ్రీవారి సేవకులు పాలు, మజ్జిగ, ఉప్మా, పులిహోర, సాంబారన్నం, టమాటా రైస్ తదితర పదార్థాలను భక్తులకు పంపిణీ చేస్తారు. రద్దీ సమయాల్లో ఈ పంపిణీలో ఇబ్బందులు ఎదురవుతున్నాయి.

ఈ నేపథ్యంలో టిటిడి ఇంజనీరింగ్, క్యాటరింగ్ విభాగాలు కలిసి రూ. 10 లక్షల అంచనా వ్యయంతో 7 మీటర్ల పొడవైన మూవింగ్ టేబుల్ను రూపొందించాయి. ఇది కన్వేయర్ బెల్ట్ తరహాలో పనిచేస్తుంది. టేబుల్పై అన్నప్రసాదాల ప్లేట్లు ఉంచగానే అవి చుట్టూ క్రమంగా తిరిగి భక్తులకు అందుబాటులోకి వస్తాయి. భక్తులు ఆగాల్సిన అవసరం లేకుండా నడుచుకుంటూనో లేదా లైన్లో ఉండగానో ప్రసాదం తీసుకోవచ్చు.

తిరుమల శిలాతోరణం సమీపంలోని 45వ గేటు వద్ద ఈ విధానాన్ని అధికారులు ప్రయోగాత్మకంగా పరీక్షించారు. ప్రసాదాల పంపిణీ విజయవంతమైందని, భక్తులు సంతృప్తి వ్యక్తం చేశారని టిటిడి తెలిపింది.

ఈ విజయంతో వైకుంఠం క్యూ కాంప్లెక్స్ 1, 2, నారాయణగిరి ఉద్యానవనాల షెడ్లు ఇతర ముఖ్య క్యూ లైన్లలో దాదాపు 10 మూవింగ్ టేబుల్లను ఏర్పాటు చేయాలని టిటిడి నిర్ణయించింది. ప్రస్తుత 7 మీటర్ల పొడవును రాబోయే రద్దీకి అనుగుణంగా 12 నుంచి 15 మీటర్లకు పెంచేందుకు ప్రతిపాదనలు సిద్ధమవుతున్నాయి.