పంట వ్యర్థాలు కాల్చడంపై రైతులకు అవగాహన కల్పించిన మంత్రి తుమ్మల

తెలంగాణ వ్యవసాయ శాఖ మంత్రి తుమ్మల నాగేశ్వరరావు సెక్రటేరియట్‌లో జరిగిన 'రైతు నేస్తం' కార్యక్రమంలో పాల్గొన్నారు. పంట వ్యర్థాలు, ముఖ్యంగా వరి పొట్టు కాల్చడంతో కలిగే నష్టాలపై రైతులకు అవగాహన కల్పించారు.

పంట అవశేషాలు కాల్చడం వల్ల భూసారం తగ్గిపోతుందని మంత్రి తెలిపారు. భవిష్యత్తులో రసాయన ఎరువులపై ఆధారపడే పరిస్థితి వస్తుందని హెచ్చరించారు. నేల ఆరోగ్యంతోపాటు మనుషుల ఆరోగ్యానికి కూడా హాని కలుగుతుందన్నారు.

వేసవి కాలంలో మంటలు వేగంగా వ్యాపించే ప్రమాదం ఉందని మంత్రి తుమ్మల హెచ్చరించారు. ఇది ఆస్తి నష్టం, ప్రాణ నష్టానికి దారితీయవచ్చని పేర్కొన్నారు. భూమి గట్టిపడిపోవడం వల్ల వేసిన ఎరువులు సక్రమంగా గ్రహించబడవని, పంట దిగుబడి కూడా తగ్గిపోతుందని ఆయన వివరించారు.