TVS రైడర్‌కు ఐదో మార్వెల్ ఎడిషన్: డాక్టర్ డూమ్ థీమ్‌తో కొత్త వేరియంట్, ధర రూ.95,320

TVS మోటార్ కంపెనీ తన ప్రజాదరణ పొందిన రైడర్ మోటార్‌సైకిల్‌కు మరో కొత్త మార్వెల్ ప్రేరేపిత ఎడిషన్‌ను విడుదల చేసింది. ‘సూపర్ స్క్వాడ్’ సిరీస్‌లో భాగంగా వచ్చిన ఈ ఐదో వేరియంట్ విలన్ డాక్టర్ డూమ్ నుంచి స్ఫూర్తి పొందింది. ఈ ప్రత్యేక ఎడిషన్‌లో డాక్టర్ డూమ్ థీమ్‌తో కూడిన గ్రాఫిక్ లివరీ, సరికొత్త బ్లాక్-గ్రీన్ కలర్ స్కీమ్ మాత్రమే మార్పులు. ఇంజిన్, ఫీచర్లు, మెకానికల్ వివరాల్లో ఎలాంటి మార్పు లేదు. ఈ ఎడిషన్ ధర రూ. 95,320 (ఎక్స్‌-షోరూమ్)గా నిర్ణయించారు.

TVS గతంలో వాల్వరైన్, థార్, బ్లాక్ పాంథర్, డెడ్‌పూల్ వంటి మార్వెల్ క్యారెక్టర్లతో ఎడిషన్‌లు తీసుకువచ్చింది. కంపెనీ ఇప్పటికే మార్వెల్ ప్రేరేపిత ఎడిషన్లకు సంబంధించి ఐదు లక్షల యూనిట్లు విక్రయించినట్లు తెలిపింది. రైడర్ వేరియంట్లపై యువతలో ఉన్న ఆసక్తి దృష్ట్యా ఈ కలెక్టర్స్ ఎడిషన్‌లను మరింతగా విస్తరిస్తున్నట్లు చెప్పొచ్చు. డాక్టర్ డూమ్ థీమ్ ఎంట్రీ లెవల్ స్పోర్ట్స్ బైక్ విభాగంలో కొత్త శైలిని తీసుకురావడం గమనార్హం.

టీవీఎస్ రైడర్ 124.8cc ఇంజిన్‌తో వస్తుంది. ఇందులో స్మార్ట్‌కనెక్ట్ ఫీచర్లు, డిజిటల్ ఇన్‌స్ట్రుమెంట్ క్లస్టర్ వంటి సౌకర్యాలు ఉన్నాయి. మార్వెల్ ఎడిషన్లు కేవలం కాస్మొటిక్ అప్‌డేట్లు అయినప్పటికీ, వాటి ప్రత్యేకత వల్ల అమ్మకాలు పెరుగుతున్నాయని కంపెనీ వర్గాలు పేర్కొంటున్నాయి. ప్రస్తుతం బజాజ్ పల్సర్, హీరో ఎక్స్‌ట్రీమ్ వంటి మోడళ్లతో పోటీ పడుతున్న ఈ బైక్ నూతన ఎడిషన్‌తో మరింత ఆకర్షణీయంగా మారింది.