ఉప్పాడ–కాకినాడ బీచ్ రోడ్డుకు తుఫాన్ అలల దెబ్బ, 40 అడుగుల రోడ్డులో 6 అడుగులే మిగిలింది

కాకినాడ జిల్లాలో ఉప్పాడ నుంచి కాకినాడకు వెళ్లే బీచ్ రోడ్డు ఇటీవల వచ్చిన తుఫాన్ ప్రభావంతో భారీగా దెబ్బతింది. 40 అడుగుల వెడల్పున్న ఈ రోడ్డులో ఇప్పుడు సుమారు ఆరు అడుగుల భాగం మాత్రమే మిగిలింది.

తుఫాన్ తీరం దాటిన సమయంలో గంటకు సుమారు 100 నుంచి 160 కిలోమీటర్ల వేగంతో ఈదురుగాలులు వీచాయి. ఆ సమయంలో సముద్రం ఉప్పొంగి భారీ కెరటాలు ఎగిసిపడ్డాయి. దీంతో ఈ మార్గంలోని కొత్తపట్నం, కొత్తపేట, పల్లిపేట, సుబ్బంపేట, రంగంపేట ప్రాంతాల్లో రోడ్డు కోతకు గురైంది.

ఈ రోడ్డును నేల మట్టం నుంచి సుమారు 12 అడుగుల ఎత్తులో నిర్మించారు. దానిపై మరో ఆరు అడుగుల ఎత్తున రాతి గోడ (బండరాలు) ఏర్పాటు చేశారు. ఆ రాతి గోడను సైతం అలలు కొట్టేశాయి. సుబ్బంపేట, రంగంపేట ప్రాంతాల్లో సుమారు 60 నుంచి 100 అడుగుల మేర రోడ్డు పూర్తిగా కొట్టుకుపోయింది.

ఈ మార్గంలో రాకపోకలు పూర్తిగా నిలిచిపోయాయి. రాతి గోడ కొట్టుకుపోవడంతో ఇప్పుడు సముద్రం నీటి మట్టం స్థానిక నేల మట్టంతో సమానంగా ఉంది. సముద్రం మళ్లీ ఉప్పొంగి భారీ కెరటాలు వస్తే, ఆ నీరు గ్రామాల్లోకి చేరే అవకాశం ఉంది. గ్రామాలు మునిగే ప్రమాదం కూడా ఉంది.