దీపావళి ముందు రేషన్ కార్డుదారులకు రాయితీ ధరల్లో నిత్యవసర వస్తువులు

దీపావళి పండగకు ముందు రేషన్ కార్డు దారులకు నిత్యవసర వస్తువులు తక్కువ ధరలకే అందించాలని ఆంధ్రప్రదేశ్ ప్రభుత్వం నిర్ణయించింది. వచ్చే నెల నుంచి ఈ వస్తువులు రేషన్ షాపుల్లో అందుబాటులోకి రానున్నాయి. ఈ నిర్ణయం వల్ల రాష్ట్రంలోని సుమారు 1.48 కోట్ల మంది రేషన్ కార్డు దారులకు ప్రయోజనం కలగనుంది.

రేషన్ షాపుల్లో కందిపప్పు కిలో ₹100కు, నూనె లీటర్ ₹125కు, గోధుమ పిండి కిలో ₹25కు, ఉల్లిపాయలు కిలో ₹35కు దొరకనున్నాయి. ప్రతి వస్తువును 2 కిలోల చొప్పున ఇవ్వాలని ప్రభుత్వం నిర్ణయించింది. బయట మార్కెట్‌లో ధరలు ఎలా ఉన్నా రేషన్ షాపుల్లో ఈ ధరలే ఉంటాయి.

ఈ పథకం కోసం రాష్ట్ర ఖజానాకు దాదాపు ₹100 కోట్ల భారం పడనుంది. పండగకు ముందే నాణ్యమైన వస్తువులు అందించాలని సివిల్ సప్లై శాఖకు ఆదేశాలు జారీ అయ్యాయి. ఆ శాఖ ఈ వస్తువుల సరఫరాపై కార్యాచరణ మొదలుపెట్టింది.

బియ్యం ధరలపై కూడా ప్రభుత్వం కట్టడి విధించింది. BPT రైస్ ధర కిలో ₹66, స్టీమ్ రైస్ ధర కిలో ₹47 మించకూడదని మిల్లర్లకు ఆదేశాలు ఇచ్చింది. ప్రస్తుతం BPT బియ్యం ధర ₹66 ఉండగా, రేషన్ షాపులో అది ₹45కు అందుతోంది. ధరణి మొబైల్ వ్యాన్లు, రైతు బజార్లలో కిలో ₹49 నుంచి ₹50కు నాణ్యమైన బియ్యం అమ్మకం జరుగుతోంది.

చక్కెర, బెల్లంపై రాయితీ ఇస్తామని ప్రభుత్వం ఎలాంటి ప్రకటన చేయలేదు. వచ్చే నెలలో దీపావళి పండగకు ముందే ఈ నిత్యవసర వస్తువులు రేషన్ షాపుల్లో అందుబాటులోకి రావాలని ప్రభుత్వం లక్ష్యంగా పెట్టుకుంది.