శ్రీకాకుళంలో వరద ముంపు: ఆర్టీసీ కాంప్లెక్స్ నీటిలో, వంశధార ఉగ్రరూపం

శ్రీకాకుళం జిల్లాలో మూడు రోజులుగా కురుస్తున్న భారీ వర్షాల వల్ల లోతట్టు ప్రాంతాలు ఇంకా ముంపులోనే ఉన్నాయి. శ్రీకాకుళం ఆర్టీసీ కాంప్లెక్స్ మొత్తం నీటిలో మునిగింది. మూడు రోజులుగా ప్రయాణికులు ఇబ్బందులు పడుతున్నారు.

అధికారులు మోటర్ల సహాయంతో నీటిని తోడేస్తున్నారు. కానీ వర్షం కొనసాగుతుండటంతో మళ్లీ నీరు చేరుతోంది.

వంశధార నది ఉగ్రరూపం దాల్చింది. గొట్ట బ్యారేజీ వద్ద ప్రస్తుతం మొదటి ప్రమాద హెచ్చరిక ఉంది. మూడో ప్రమాద హెచ్చరిక జారీ చేసే అవకాశం కనిపిస్తోంది. మధ్యాహ్నం 3 గంటల సమయానికి సుమారు 1,20,000 క్యూసెక్కుల వరద నీరు వచ్చే అవకాశం ఉంది.

కొత్తూరు మండలం పెనుగోటవాడ గ్రామం చుట్టూ వరద నీరు చేరింది. మాతల దగ్గర వర్షపు నీరు రోడ్డుపైకి ప్రవహించడంతో ఒడిశాలోని హడ్డు బంకి ప్రాంతానికి రాకపోకలు నిలిచిపోయాయి.

బహుదా నది కూడా ఉగ్రరూపం దాల్చింది. జాతీయ రహదారిపై నీరు చేరడంతో రాకపోకలకు అంతరాయం ఏర్పడింది. రైల్వే ట్రాక్లు కూడా దెబ్బతిన్నాయి. దీంతో రైళ్లను దారి మళ్లించారు. ఒడిశాలోని బగలబట్టి జలాశయం నుంచి ఒక్కసారిగా నీరు విడిచిపెట్టడంతో బహుదా నదిలో సుమారు 2,06,000 క్యూసెక్కుల నీరు ప్రవహిస్తోంది.

ఈసేనపేట, రక్తకన్న, జగన్నాధపురం, పేటూరు గ్రామాలు జలదిగ్బంధంలో ఉన్నాయి. ఇచ్ఛాపురం పాత టోల్ ప్లాజా సమీపంలో జాతీయ రహదారిపై నీరు రావడంతో రాకపోకలు పూర్తిగా నిలిచిపోయాయి.

నాగావళి నది విషయంలో విజయనగరం జిల్లా మడ్డువలస జలాశయం నుంచి ఏడు గేట్ల ద్వారా నీరు విడుదల చేశారు. నాగావళి ప్రస్తుతం నిలకడగా ప్రవహిస్తోంది. నదీ పరివాహక ప్రాంతాల్లోని ప్రజలు అప్రమత్తంగా ఉండాలని కలెక్టర్ సూచించారు.

ఒడిశా నుంచి మహేంద్రతనయ నది నీరు ఒక్కసారిగా వచ్చి వంశధారలో కలవడంతో వరద పెరిగింది. రాత్రి సమయానికి నాగావళికి కూడా వరద వచ్చే అవకాశం ఉంది. వంశధార, మహేంద్రతనయ, బహుదా నదులు ప్రస్తుతం ఉగ్రరూపంతో ప్రవహిస్తున్నాయి.