ఇరాన్ ఓడరేవులపై అమెరికా నౌకా దిగ్బంధనం; సాధారణ నౌకల రాకపోకలకు అనుమతి

ఇరాన్ ఒప్పందాన్ని ఉల్లంఘించినందుకు ప్రతిస్పందనగా అమెరికా హార్ముజ్ జలసంధిలో ఇరాన్ ఓడరేవులకు వెళ్లే లేదా అక్కడి నుంచి బయలుదేరే నౌకలపై పూర్తి స్థాయి నౌకా దిగ్బంధనాన్ని అమలు చేస్తోంది. 10,000 మందికి పైగా అమెరికా నావికులు, మెరైన్లు, వైమానిక సిబ్బంది, రెండు విమాన వాహక నౌకలు, 20కి పైగా యుద్ధ నౌకలు, డజన్ల కొద్దీ విమానాలు ఈ ఆపరేషన్‌లో పాల్గొంటున్నట్లు వైట్హౌస్ తెలిపింది.

దిగ్బంధన అమలు తొలి 24 గంటల్లోనే రెండు సహకరించిన వాణిజ్య నౌకలను దారి మళ్లించగా, ఒక సహకరించని నౌకను నిర్వీర్యం చేసినట్లు US సెంట్‌కామ్ వెల్లడించింది. అయితే, ఇరాన్ ఓడరేవులకు వెళ్లని లేదా అక్కడి నుంచి రాని నౌకలకు జలసంధి పూర్తిగా తెరిచి ఉంచినట్లు అధికారులు స్పష్టం చేశారు.

చమురు ధరల విషయానికి వస్తే, ప్రస్తుతం క్రూడ్ ఆయిల్ బ్యారెల్ ధర సుమారు 80 డాలర్లుగా ఉంది. ఈ సంఘర్షణ గరిష్ట స్థాయిలో ఉన్నప్పటి కంటే గ్యాసోలిన్ ధరలు గాలన్‌కు దాదాపు 60 సెంట్లు తగ్గాయి. చమురు మార్కెట్‌లో తాత్కాలిక అంతరాయాలు ఏర్పడవచ్చని అధ్యక్షుడు ముందే హెచ్చరించారని, కానీ ఊహించినంత స్థాయిలో ధరలు పెరగలేదని వైట్హౌస్ పేర్కొంది.

ఈ స్థిరత్వానికి కారణం అమెరికా దేశీయ ఇంధన విధానాలు, వేగవంతమైన పరిపాలనా చర్యలేనని అధికారులు తెలిపారు. వ్యూహాత్మక చమురు నిల్వల (SPR) నుంచి చమురు విడుదల, జోన్స్ చట్టం (అమెరికా నౌకాయాన నియంత్రణ) మినహాయింపు, ఇంధన పర్యావరణ మినహాయింపులు, కాలిఫోర్నియా చమురు ఉత్పత్తిని పునఃప్రారంభించేందుకు రక్షణ ఉత్పత్తి చట్టంపై సంతకం వంటి చర్యలు తీసుకున్నట్లు వివరించారు. సంఘర్షణ ముగిసే వరకు అమెరికా వినియోగదారులకు ధరలు స్థిరంగా ఉండేలా చూడటానికి అధ్యక్షుడు అన్ని ప్రయత్నాలు కొనసాగిస్తారని వైట్హౌస్ స్పష్టం చేసింది.