భారతీయ విద్యార్థులకు US F1 వీసాల మంజూరులో 62% తగ్గుదల

2025 మే నుండి ఆగస్టు మధ్యలో భారతీయ విద్యార్థులకు US F1 స్టూడెంట్ వీసాల మంజూరు గణనీయంగా తగ్గింది. US కాన్సులేట్లు ఈ కాలంలో 22,149 F1 వీసాలు జారీ చేశాయి. 2024లో ఇదే పీరియడ్‌లో 58,694 వీసాలు మంజూరు కాగా, ఇది 62% తగ్గుదల.

China విద్యార్థులకు అదే సమయంలో 34% తగ్గి, 2024లో 61,000 నుండి 2025లో దాదాపు 40,000కు పడిపోయింది. USలో అంతర్జాతీయ విద్యార్థుల్లో భారతీయులే అత్యధికంగా ఉన్నారు. ఇన్స్టిట్యూట్ ఆఫ్ ఇంటర్నేషనల్ ఎడ్యుకేషన్ ప్రకారం 2024-25 విద్యా సంవత్సరంలో 3,63,192 మంది భారతీయ విద్యార్థులు US కాలేజీలు, యూనివర్సిటీల్లో చేరారు. చైనా నుండి 2,65,919 మంది వచ్చారు.

ట్రంప్ రెండో దఫా అధికారంలోకి వచ్చిన తర్వాత వలస విధానాలు కఠినతరం చేశారు. దీంతో విదేశీ విద్యార్థులు USలో చదువుకుని కెరీర్ నిర్మించుకోవడం కష్టమవుతోంది. F1 వీసాదారుల నివాస కాలంలోనూ మార్పులు వస్తున్నాయి. గతంలో 'డ్యూరేషన్ ఆఫ్ స్టేటస్' కింద కోర్సు ముగిసే వరకు ఉండొచ్చు. కొత్త నిబంధనల ప్రకారం గరిష్ఠంగా నాలుగేళ్లు మాత్రమే ఉండొచ్చు, ఆపై మళ్ళీ అనుమతి తీసుకోవాల్సి ఉంటుంది. ఈ మార్పు సెప్టెంబర్లో అమల్లోకి రానుంది.

విదేశీ జర్నలిస్టుల వీసా నిబంధనలు కూడా కఠినతరం చేస్తున్నారు. వీసా దరఖాస్తుదారులు తమ సోషల్ మీడియా ఖాతాల సెట్టింగ్స్ పబ్లిక్‌గా ఉంచాల్సి రావచ్చని US విదేశాంగ శాఖ పేర్కొంది.