రష్యాతో వ్యాపారం చేసే దేశాలపై 100% సుంకం విధించే బిల్లుకు అమెరికా సెనెట్ ఆమోదం; భారత్పై ప్రభావం ఉండే అవకాశం

రష్యా నుంచి ముడి చమురు, గ్యాస్ కొనుగోలు చేసే దేశాలపై 100% వరకు అదనపు సుంకం విధించే అధికారాన్ని అమెరికా అధ్యక్షుడికి కల్పించే బిల్లును అమెరికా సెనెట్ ప్రవేశపెట్టింది. ఈ బిల్లు సెనెట్ లో 86-12 ఓట్ల తేడాతో తొలి ఓటింగ్‌లో ఆమోదం పొందింది.

ఈ బిల్లు చట్టంగా మారితే, రష్యా-యుక్రెయిన్ యుద్ధం నేపథ్యంలో రష్యాతో వ్యాపారం కొనసాగించే దేశాలపై ఆర్థిక ఆంక్షలు విధించే అధికారం ట్రంప్‌కు లభిస్తుంది. ప్రత్యేకించి రష్యా నుంచి భారీగా ముడిచమురు దిగుమతి చేసుకుంటున్న భారత్, చైనా వంటి దేశాలపై ఈ సుంకాల ప్రభావం పడుతుందని నిపుణులు అంచనా వేస్తున్నారు.

ప్రస్తుతం భారత్, చైనాలే రష్యా చమురుకు అతిపెద్ద కొనుగోలుదారులు. గతంలో కూడా అమెరికా రష్యా ఇంధన కొనుగోళ్లపై ఆంక్షలు విధించింది. తాజా బిల్లు ప్రకారం రష్యా నుంచి దిగుమతులపై 500% వరకు, రష్యాతో వ్యాపారం చేసే టాప్-5 దేశాలపై 100% వరకు అదనపు సుంకం విధించవచ్చు. ఈ బిల్లు ఇరాన్‌పై ఆంక్షలను 2031 వరకు పొడిగించే ప్రతిపాదన కూడా కలిగి ఉంది.

కాకపోతే, ఈ బిల్లు ఇంకా చట్టంగా మారలేదు. సెనెట్ లో తుది ఆమోదం పొందిన తర్వాత ప్రతినిధుల సభలో కూడా ఆమోదం పొందాలి. ప్రస్తుతం ప్రతినిధుల సభకు సెలవులు ఉన్నందున సెప్టెంబర్ వరకు చట్టంగా మారే అవకాశం లేదు. భారత ప్రభుత్వం ఈ బిల్లుపై ఇప్పటివరకు అధికారికంగా స్పందించలేదు.