రష్యా చమురు కొనుగోళ్లపై భారత్పై 100% టారిఫ్‌కు US సెనేట్ బిల్లు ఆమోదం

రష్యా నుంచి చమురు కొనుగోలు చేస్తున్న దేశాలపై 100% టారిఫ్ విధించే అధికారం అమెరికా అధ్యక్షుడు డొనాల్డ్ ట్రంప్‌కు కల్పించే బిల్లును US సెనేట్ భారీ మెజారిటీతో ఆమోదించింది. 86-11 ఓట్ల తేడాతో నెగ్గిన ఈ బిల్లు, రష్యా చమురు, గ్యాస్‌ను పెద్ద ఎత్తున దిగుమతి చేసే భారత్, చైనా తదితర దేశాలకు సవాలుగా మారింది.

‘లెన్సియో గ్రాహం రష్యా-ఇరాన్ ఆంక్షల చట్టం-2026’ పేరిట తెచ్చిన ఈ బిల్లు, రష్యన్ శక్తి వనరులను కొనే దేశాలు US మార్కెట్లోకి ప్రవేశించకుండా నిరోధించే లక్ష్యంతో రూపొందించబడింది. భారత్ ప్రపంచంలోనే రష్యా ముడి చమురును అత్యధికంగా దిగుమతి చేసే దేశాల్లో ఒకటి.

2022లో రష్యా-ఉక్రెయిన్ సంఘర్షణ మొదలైన తర్వాత భారత రిఫైనరీలు రాయితీ ధరలకు రష్యా చమురు కొనుగోళ్లను గణనీయంగా పెంచాయి. దీనివల్ల ఇంధన ఖర్చులు తగ్గి, దేశీయ పెట్రోల్, డీజిల్ ధరలు స్థిరంగా ఉండేందుకు సహాయపడిందని కేంద్రం స్పష్టం చేసింది. జాతీయ ప్రయోజనాలు, ఇంధన భద్రత దృష్ట్యా రష్యా నుంచి చమురు దిగుమతులు అనివార్యమని న్యూఢిల్లీ వాదిస్తోంది.

ఈ బిల్లు అమల్లోకి వస్తే భారతీయ ఎగుమతిదారులపై తీవ్ర ప్రభావం పడే అవకాశం ఉంది. ఇంజినీరింగ్ వస్తువులు, ఫార్మా ఉత్పత్తులు, రసాయనాలు, వస్త్రాలు, ఆటో విడిభాగాలు వంటి రంగాల్లో అమెరికాకు ఎగుమతులు ఖరీదవుతాయి. దీంతో US మార్కెట్‌లో భారత ఉత్పత్తులకు డిమాండ్ తగ్గొచ్చు.

అయితే, రష్యన్ ఇంధనంపై ఆధారపడటాన్ని తగ్గించిన దేశాలకు మినహాయింపులు ఇచ్చే నిబంధన, అమెరికా అధ్యక్షుడికి విస్తృత మినహాయింపు అధికారాలు ఈ బిల్లులో ఉన్నాయి. అలాగే రష్యా అధికారులు, బ్యాంకులు, ఇంధన ప్రాజెక్టులు, చమురు ట్యాంకర్లపై అదనపు ఆంక్షలు కూడా ఇందులో భాగంగా ఉన్నాయి.

ప్రస్తుతం ఈ బిల్లు US హౌస్ ఆఫ్ రిప్రజెంటేటివ్స్‌కు చేరుకుంది. అక్కడ ఆమోదం లభించి, అధ్యక్షుడు సంతకం చేస్తేనే ఇది చట్టం అవుతుంది. అప్పటి వరకు భారత వస్తువులపై కొత్త టారిఫ్ అమలు కాదని నిపుణులు స్పష్టం చేశారు.