'వంద దేవుళ్లు' సినిమా రివ్యూ – స్వాసిక విజయ్ నటనకు ప్రశంసలు, క్లైమాక్స్ ఆకట్టుకుంది

విజయ్ ఆంటోనీ, స్వాసిక విజయ్ ప్రధాన పాత్రల్లో నటించిన 'వంద దేవుళ్లు' సినిమా విడుదలై ప్రేక్షకుల ముందుకు వచ్చింది. బిచ్చగాడు ఫేమ్ శశి దర్శకత్వం వహించిన ఈ చిత్రంలో విజయ్ ఆంటోనీ మేనల్లుడు అజయ్ డిసాన్ కూడా కీలక పాత్ర పోషించాడు.

కథ విషయానికి వస్తే, భర్తను కోల్పోయిన ఒక విధవ యువతి, పిల్లలను పెంచుకుంటూ ఊరి ఆంక్షలను ఎదుర్కొంటుంది. పిల్లలు పెద్దయ్యాక ఆమె రెండో పెళ్లి ప్రస్తావన తలెత్తుతుంది. ఈ నిర్ణయానికి మొదట్లో పెద్ద కొడుకు వ్యతిరేకించినా, తర్వాత తల్లి పెళ్లి జరిగితేనే తాను పెళ్లి చేసుకుంటానని షరతు విధిస్తాడు. కానీ ఊరంతా పెళ్లిని ఆపేందుకు ప్రయత్నించడంతో ఉత్కంఠ మొదలవుతుంది.

సమీక్షకుల అభిప్రాయం ప్రకారం, మొదటి భాగం ప్రేక్షకులను ఎంగేజ్ చేసినా, సెకండ్ హాఫ్ నెమ్మదిగా సాగింది. స్వాసిక విజయ్ నటన మాత్రం చిత్రానికి ప్రధాన బలం. ఆమె తన పాత్రలో జీవించారని, అవార్డు స్థాయి ప్రదర్శన అని విమర్శకులు అభిప్రాయపడ్డారు. విజయ్ ఆంటోనీ చిన్న పాత్రలో కనిపించినా, అతని ఎంట్రీ సినిమాకు వేగం తెచ్చింది. డైలాగ్స్, సంగీతం బాగున్నాయని, కథా నేపథ్యం వాస్తవానికి దూరంగా ఉన్నప్పటికీ భావోద్వేగంగా కనెక్ట్ అయ్యే అంశాలున్నాయని రివ్యూలు చెబుతున్నాయి.