వందేమాతరం అవమానిస్తే ఇక జైలు శిక్ష; పార్లమెంట్‌లో బిల్లు ఆమోదం

దేశ భక్తి గీతం ‘వందేమాతరం’ను అవమానించడాన్ని నేరంగా పరిగణిస్తూ కేంద్ర ప్రభుత్వం తీసుకువచ్చిన కీలక బిల్లుకు పార్లమెంట్ ఆమోదం లభించింది. జాతీయ గౌరవానికి అవమానాల నిరోధక చట్ట సవరణ బిల్లు-2026ను లోక్‌సభ, రాజ్యసభలు ఆమోదించాయి. కొత్త చట్టం ప్రకారం ఎవరైనా ఉద్దేశపూర్వకంగా ‘వందేమాతరం’ను అవమానించినా, దాని ఆలాపనకు అడ్డంకి కలిగించినా వారికి మూడేళ్ల వరకు జైలు శిక్ష, జరిమానా లేదా రెండూ విధించే అవకాశం ఉంది.

ఈ బిల్లు రాష్ట్రపతి ఆమోదం పొందిన తర్వాత చట్టంగా మారుతుంది. ప్రస్తుతం జాతీయ పతాకం, జాతీయ గీతం ‘జనగణమన’ను అవమానించడం నేరంగా ఉన్నప్పటికీ, ‘వందేమాతరం’కు ఇలాంటి రక్షణ లేదు. దీన్ని దృష్టిలో ఉంచుకుని ఈ సవరణ ద్వారా ‘వందేమాతరం’కు జాతీయ గీతంతో సమానమైన చట్టపరమైన రక్షణ కల్పించారు.

‘వందేమాతరం’ను 1870లలో బంకించంద్ర ఛటర్జీ రచించారు. ఇది సంస్కృత, బెంగాళీ మిశ్రమ భాషలో సాగింది. ఆరు చరణాలతో కూడిన ఈ గీతం మొదటిసారి 1896లో కోల్‌కతాలో జరిగిన భారత జాతీయ కాంగ్రెస్ సమావేశంలో బహిరంగంగా ఆలపించబడింది. బంకించంద్ర రచించిన ప్రఖ్యాత నవల ‘ఆనందమఠ్’లో ఇది మొదట కనిపించింది. స్వాతంత్ర్య ఉద్యమంలో ఈ గీతం ప్రధాన స్ఫూర్తిగా నిలిచింది.

జాతీయ గౌరవ చట్టం కింద ఇప్పటికే జాతీయ పతాకం, జాతీయ గీతం, రాజ్యాంగం, జాతీయ చిహ్నాలకు రక్షణ ఉంది. ఈ సవరణతో ‘వందేమాతరం’కు కూడా పూర్తి చట్టపరమైన గౌరవం లభించనుంది. కాగా, ఈ చట్టం అమల్లోకి వచ్చిన తర్వాత దేశ వ్యాప్తంగా పాటించే అవకాశం ఉంది. దీని వల్ల ప్రభుత్వ, ప్రైవేటు సంస్థలతో పాటు వ్యక్తులకు నిబంధనలు వర్తిస్తాయి.