ఏ వ్యక్తి అయినా నేరం చేస్తే శిక్ష తప్పదు: మంత్రి వంగలపూడి అనిత

నేరం నిరూపితమైన వ్యక్తి ఎంతటి వాడైనా శిక్ష నుంచి తప్పించుకోలేడని ఏపీ మంత్రి వంగలపూడి అనిత స్పష్టం చేశారు. పడమట పోలీస్ స్టేషన్ నుంచి డ్రగ్స్ మాఫియా తప్పించుకున్న ఘటన, ఓ గంజా కేసు నిందితుడు సోహెల్ పారిపోవడంపై ఆమె మాట్లాడారు.

పడమట పోలీస్ స్టేషన్‌లో నమోదైన కేరళకు చెందిన డ్రగ్స్ మాఫియా కేసు దర్యాప్తుకు సంబంధించి ఇప్పటికే ఎంక్వైరీ చేయాలని ఆదేశించామని, డిపార్ట్‌మెంట్ విచారణ కొనసాగుతోందని మంత్రి తెలిపారు. గంజా కేసులో నిందితుడు సోహెల్ పారిపోయిన నేపథ్యంలో, సీపీ ఆధ్వర్యంలో ప్రత్యేక బృందాలు అతడిని గాలిస్తున్నాయని చెప్పారు.

నేరస్థులను పట్టుకునే సామర్థ్యానికి ఉదాహరణగా ఇటీవలి సంఘటనలను ఆమె ప్రస్తావించారు. సబవరంలో ఓ గంజా కేసు నిందితుడు రిమాండ్ సమయంలో తప్పించుకుని, రెండు రోజుల్లోనే పట్టుబడ్డాడని, అతడిని మళ్లీ సెంట్రల్ జైలుకు తరలించామని వివరించారు. అంతేకాకుండా, చాలా ఏళ్ల క్రితం జైలు నుంచి తప్పించుకున్న భీముడిని కూడా ఇటీవల చెన్నైలో పట్టుకున్నామని గుర్తు చేశారు.

“నేరం చేసిన వ్యక్తికి వృత్తి, కులం, పార్టీ ఉండదు. ఎంత పెద్ద స్థాయి వ్యక్తి అయినా నేరం నిరూపితమైతే కంపల్సరీగా శిక్ష ఉంటుంది” అని మంత్రి అనిత స్పష్టం చేశారు. ప్రస్తుతం ఈ కేసుల దర్యాప్తు కొనసాగుతున్న నేపథ్యంలో, నిందితులు పట్టుబడేందుకు అన్ని చర్యలు తీసుకుంటున్నామని ఆమె ధృవీకరించారు.