వరుణ్ తేజ్: కొత్త సినిమా హెయిర్ స్టైల్ పై నెగటివ్ కామెంట్లపై స్పందన

నటుడు వరుణ్ తేజ్ తన రాబోయే సినిమా కోసం చేసిన ప్రయోగాత్మక హెయిర్ స్టైల్‌పై వచ్చిన ట్రోలింగ్‌పై స్పందించారు. ఈ సినిమాలో ఆయన కెనకరాజు, ఒక కొరియన్ ఫ్యాక్టరీ కార్మికుడు అనే రెండు పాత్రల్లో నటిస్తున్నారు. కొరియన్ పాత్ర కోసం ముంబై స్టయిలిస్ట్ దర్శన్ సహకారంతో పూర్తిగా ఫంకీ లుక్ ఇచ్చారు.

'కెనకరాజు గెటప్‌కి భిన్నంగా ఉండేలా ఈ హెయిర్ స్టైల్ డిజైన్ చేశాం. ఇది చాలా పెద్ద ప్రయోగం. షూటింగ్‌లో ఇది బాగానే ఉంది కానీ బయట తిరిగేటప్పుడు మాత్రం చాలా దెబ్బలకు గురైయ్యా' అని వరుణ్ తేజ్ చెప్పారు. రోడ్లపై, ఇంట్లో కూడా 'ఏంటి ఈ పిచ్చి జుట్టు' అంటూ తిట్లు వినాల్సి వచ్చిందని, కానీ హైదరాబాద్‌లో క్యాప్ వేసుకుని మేనేజ్ చేశానని వివరించారు.

చిత్రీకరణలో భాగంగా కజకిస్తాన్‌కు వెళ్లినప్పుడు అక్కడి భాష అర్థంకాలేదని, అయినా ప్రజలు తన హెయిర్ స్టైల్ చూసి నెగటివ్‌గా మాట్లాడినట్టు గుర్తించానని చెప్పారు. తన తల్లి కూడా ఎప్పుడూ 'ఏంటి ఈ అవతారం' అని అంటూ ఉండేదని, భార్య లావణ్య త్రిపాఠి మాత్రం ఓ నటి కావడంతో తన బాధ అర్థం చేసుకుందని నవ్వుతూ చెప్పారు. పాత్ర వివరాల్లో తనను కొరియన్ అని చాలా మంది భావించారని, కానీ కేవలం కొరియన్ ఫ్యాక్టరీలో పనిచేసే భారతీయుడి పాత్రేనని స్పష్టం చేశారు.