వెంకటగిరి పోలేరమ్మ అమ్మవారి జాతర 27 నుంచి అక్టోబర్ 1 వరకు

వెంకటగిరి పోలేరమ్మ అమ్మవారి జాతర ఈ ఏడాది 27 నుంచి అక్టోబర్ 1 వరకు జరగనుంది. వినాయక చవితి తర్వాత తొలి బుధవారం రాజకుటుంబీకులు సంప్రదాయ తాంబూలం అందించడంతో జాతర అంకురార్పణ జరుగుతుంది.

అదే రోజు తొలి చాటింపు నిర్వహిస్తారు. ఆ తర్వాతి బుధవారం రెండో చాటింపు జరుగుతుంది. మిరాసీదారుల ఇంట్లో మట్టికుండలకు పూజలు చేసి, వాటిని రాజభవంతికి ఊరేగింపుగా తీసుకెళ్తారు. అక్కడ రాజకుటుంబీకులు తొలి పూజ చేస్తారు.

జాతరలో కీలక ఘట్టంగా కుమ్మరి మండపంలో పుట్టమట్టితో అమ్మవారి ప్రతిమను తయారు చేస్తారు. చాకలి మండపంలో అలంకరించి ప్రత్యేక పూజలతో ప్రాణ ప్రతిష్ట నిర్వహిస్తారు. పూలరథంపై అమ్మవారిని కొలువుతీర్చి పురవీధుల్లో శోభాయాత్ర నిర్వహిస్తారు.

తెల్లవారుజామున 5 గంటల నుంచి భక్తులకు దర్శనం ఉంటుంది. మధ్యాహ్నం 4 గంటల తర్వాత విరూప మహోత్సవం ప్రారంభమవుతుంది. భక్తులు పొలిటెంకాయలు కొట్టి మొక్కులు చెల్లించుకుంటారు. విరూపం అనంతరం అమ్మవారి ప్రతిమ మట్టిని భక్తులు తీసుకెళ్తారు.

2023 నుంచి ఈ జాతర రాష్ట్ర పండుగగా కొనసాగుతోంది. లక్షలాది మంది భక్తులు వచ్చే అవకాశం ఉన్నందున అధికారులు విస్తృత ఏర్పాట్లు చేస్తున్నారు.