తమిళ నేత విజయ్ నుదిటి నల్లని తిలకం రహస్యం: అరగజ తిలకం ప్రత్యేకత ఏమిటి?

తమిళ నటుడు, తమిళగ వెట్రీ కళగం (TVK) అధినేత విజయ్ బహిరంగ సభలకు కోటు సూటుతో పాటు నుదిటిపై ప్రత్యేకమైన నల్లని తిలకాన్ని ధరించడం ఇటీవల చర్చనీయాంశమైంది. ఆ తిలకాన్ని ‘అరగజ తిలకం’గా పిలుస్తారని TVK ప్రతినిధులు, పత్రిక కథనాల ద్వారా తెలుస్తోంది.

సహజ సిద్ధమైన ఆధ్యాత్మిక సుగంధ ద్రవ్యాలైన పునుగు, జువ్వాది, పచ్చకర్పూరం, వట్టి వేళ్ళ రసంతో ఈ తిలకాన్ని ప్రత్యేకంగా తయారు చేస్తారు. ఇది హిందూ సాంప్రదాయంలో ఆలయ పూజలు, అభిషేకాల్లో వాడే ‘అరగజ పూత’ నుండి వచ్చింది. విజయ్ ఈ తిలకం ధరించడం మొదలుపెట్టాక మార్కెట్లో దీని ధర రూ.30-40 నుండి రూ.100కి పెరిగిందని, నకిలీలు కూడా చెలామణీ అవుతున్నాయని స్థానిక వర్గాలు చెబుతున్నాయి.

శాస్త్ర విశ్వాసం ప్రకారం నుదిటిపై అరగజ తిలకం ధరిస్తే దిష్టి తగలదని, చుట్టూ ఉండే ప్రతికూల శక్తులు తొలగిపోయి సానుకూల వాతావరణం ఏర్పడుతుందని నమ్ముతారు. విజయ్ ప్రస్తుతం తమిళనాడు రాష్ట్రవ్యాప్తంగా రాజకీయ ప్రచారంలో తీవ్రంగా ఉన్నారు. భారీ జనసమూహం, రాజకీయ విమర్శలు, ప్రజా క్షేత్రంలోని ఒత్తిళ్ల మధ్య ప్రతికూల ప్రభావాలు తనపై పడకుండా ఉండేందుకు ఈ తిలకాన్ని ధరిస్తున్నట్లు చర్చ జరుగుతోంది.

కోటు సూటుతో ఆధునిక రాజకీయ ప్రవేశం, నుదిటిపై సాంప్రదాయ బొట్టు – ఈ రెండింటి కలయిక విజయ్ ప్రత్యేక గుర్తింపుగా మారింది. ఆయన రాజకీయ ప్రస్థానంపై ఈ చిహ్నం కొత్త ఉత్సుకతను రేపుతోంది.