వీసా కంపెనీలో 2,600 ఉద్యోగాల తొలగింపు.. AI పెనుమార్పు.. హైదరాబాద్‌పై ప్రభావం

ప్రపంచ దిగ్గజ పేమెంట్స్ కంపెనీ వీసా భారీ లాభాలు ఆర్జించినప్పటికీ ఒకే రోజులో 2,600 మందికి పైగా ఉద్యోగులను తొలగించింది. ఈ నిర్ణయం కంపెనీ కార్యనిర్వాహణ వ్యూహంలో భారీ మార్పుకు సంకేతం.

జులై 28న వీసా తన మూడో త్రైమాసిక ఫలితాల్లో 5.63 బిలియన్ డాలర్ల నికర లాభాన్ని ప్రకటించింది. సరిగ్గా ఆ మరుసటి రోజు, జులై 29 తెల్లవారుజామున 4 గంటలకు 2,600 మంది ఉద్యోగులను (మొత్తం వర్క్‌ఫోర్స్‌లో 7%) తొలగిస్తూ ఈ-మెయిల్స్ పంపింది. ఈ తొలగింపులు ప్రధానంగా టెక్నాలజీ, ప్రొడక్ట్ టీములను లక్ష్యంగా చేసుకున్నాయి. జూనియర్ నుంచి సీనియర్ ఎగ్జిక్యూటివ్‌లు, ఇంజనీరింగ్ లీడర్లు, పరిశోధకుల వరకు ఎవరికీ మినహాయింపు లేదు.

తొలగింపులకు కారణం ఆర్టిఫిషియల్ ఇంటెలిజెన్స్ (AI). వీసా భవిష్యత్తును పూర్తిగా AI చుట్టూ నిర్మించాలని నిర్ణయించింది. కంపెనీ CEO మెచ్ ఎర్నీ మాట్లాడుతూ, 'మానవ పర్యవేక్షణ అవసరం లేకుండా పనులు చేయగల ఏజెంటిక్ AI వైపు వీసా వేగంగా అడుగులు వేస్తోంది' అని పేర్కొన్నారు. ఇకపై ఉద్యోగులు AI సాయంతో వేగంగా పనిచేస్తారా లేదా AIనే మనుషుల స్థానంలో పనిచేస్తుందా అన్నదే కొత్త ప్రశ్నగా మారింది.

భారత్‌పై ప్రభావం గణనీయంగా ఉండే అవకాశముంది. వీసాకు హైదరాబాద్, బెంగళూరు, ముంబై, చెన్నై లాంటి టెక్ హబ్‌లలో 3,500 మందికి పైగా ఉద్యోగులున్నారు. తాజా తొలగింపుల్లో భారతీయ ఉద్యోగులెంత మంది ప్రభావితమయ్యారనేది కంపెనీ ఇంకా వెల్లడించలేదు.

ఈ ధోరణి కేవలం వీసాకే పరిమితం కాదు. మాస్టర్‌కార్డ్ తన గ్లోబల్ ఉద్యోగుల్లో 4% మందిని తొలగిస్తోంది. ఫిన్‌టెక్ సంస్థ బ్లాక్ దాదాపు 4,000 ఉద్యోగాలను తగ్గించుకుంటోంది. చెల్లింపుల పరిశ్రమ మొత్తం పెనుమార్పు దిశగా సాగుతోంది. అయితే, మరో ఆసక్తికరమైన అంశం ఏంటంటే.. AI తొలగింపులపై నాయకత్వం ఇప్పుడు పశ్చాత్తాపం చెందుతోంది. ఒక అధ్యయనం ప్రకారం 55% మంది కార్పొరేట్ లీడర్లు AI కారణంగా చేసిన తొలగింపులను తప్పుగా భావిస్తూ, 2027 నాటికి సగం కంపెనీలు తొలగించిన కస్టమర్ సర్వీస్ ఉద్యోగులను తిరిగి నియమించుకుంటాయని గార్ట్‌నర్ అంచనా వేసింది. అంటే AI మనిషిని పూర్తిగా భర్తీ చేయలేదని, ఉత్పాదకత సాధనంగా మాత్రమే ఉపయోగపడుతుందనే అభిప్రాయం బలపడుతోంది.