భోగాపురం విమానాశ్రయం సివిల్ పనులు 99% పూర్తి — విజయనగరం కలెక్టర్

విజయనగరం జిల్లా కలెక్టర్ రామసుందర్ రెడ్డి భోగాపురం అంతర్జాతీయ విమానాశ్రయం పనుల తాజా స్థితిని వెల్లడించారు. సివిల్ పనులు 99% పూర్తయ్యాయని, మిగిలిన అంతర్గత పనులు ఈ నెల చివరిలోగా పూర్తవుతాయని ఆయన తెలిపారు.

భూమికి సంబంధించిన కొన్ని కేసులు హైకోర్టులో, LRR అథారిటీ దగ్గర పెండింగ్‌లో ఉన్నాయి. చాలా కాలంగా LRR అథారిటీ జడ్జి పోస్టు ఖాళీగా ఉండగా, ప్రభుత్వం ఇటీవల ఆ పోస్టు భర్తీ చేసింది. ఆ కేసులను వేగంగా పరిష్కరించి నష్టపరిహారం చెల్లిస్తామని కలెక్టర్ పేర్కొన్నారు.

విశాఖపట్నం నుంచి రాయపూర్ వరకు నిర్మిస్తున్న Greenfield Highway దాదాపు పూర్తి కావచ్చింది. ఈ రహదారి పక్కన ఉన్న భూమి పారిశ్రామిక అభివృద్ధికి అనుకూలంగా మారిందని, ఇప్పటికే పలు పెట్టుబడిదారులు ఆసక్తి చూపుతున్నారని ఆయన చెప్పారు.

జిల్లాలో 8,024 చిన్న సాగునీటి చెరువులు ఉన్నాయి. వాటిలో నీటి నిల్వ సామర్థ్యం పెంచేందుకు 13,800 పనులు గుర్తించారు. ఈ పనులు పూర్తయితే చెరువుల్లో 20 MCFeet నీరు నిల్వ అవుతుందని, అధిక భాగం మండలాల్లో భూగర్భ జలాలు 5-6 మీటర్ల వరకు వస్తాయని కలెక్టర్ వివరించారు.

భోగాపురం విమానాశ్రయం మరియు Greenfield Highway పూర్తయిన తర్వాత ఉత్తరాంధ్ర ప్రాంతంలో ఉపాధి అవకాశాలు, వ్యాపార, పారిశ్రామిక రంగాలు మెరుగుపడతాయని కలెక్టర్ అభిప్రాయపడ్డారు.