వరంగల్ ఎంజీఎం క్యాన్సర్ ఆసుపత్రిలో డాక్టర్ల కొరత, పనిచేయని యంత్రాలు

వరంగల్ ఎంజీఎం ఆసుపత్రిలో క్యాన్సర్ చికిత్స విభాగంలో డాక్టర్లు లేక పేషెంట్లు ఇబ్బందులు పడుతున్నారు. మెడికల్ ఆంకాలజీ విభాగంలో కేవలం ఒక్క అసిస్టెంట్ ప్రొఫెసర్ మాత్రమే కాంట్రాక్ట్ పద్ధతిలో పనిచేస్తున్నారు.

సర్జికల్ ఆంకాలజీ ఆధ్వర్యంలో 25 పడకలతో క్యాన్సర్ యూనిట్ ఏర్పాటు చేసిన ప్రభుత్వం, లక్షలాది రూపాయలతో ఆధునిక పరికరాలు కొనుగోలు చేసింది. అయితే ప్రస్తుతం ఆ యంత్రాలు సాంకేతిక లోపాలతో పనిచేయడం లేదని పేషెంట్లు ఆరోపిస్తున్నారు. మెడికల్ ఆంకాలజీ విభాగంలో ఉన్న ఇతర వైద్యులను ఇటీవల బదిలీ చేశారు.

ఉత్తర తెలంగాణకు పెద్ద దిక్కుగా ఉన్న ఈ ఆసుపత్రికి వరంగల్, ఖమ్మం, ఆదిలాబాద్ జిల్లాలతో పాటు మహారాష్ట్ర, ఛత్తీస్గఢ్ నుంచి కూడా రోజుకు 2500 నుంచి 3000 మంది పేషెంట్లు వస్తుంటారు. మెడికల్, సర్జికల్ ఆంకాలజీ రెండు విభాగాలకు ఒకే డాక్టర్ ఉండటం ప్రధాన సమస్యగా మారింది. క్యాన్సర్ పేషెంట్ల సంఖ్య పెరుగుతున్న నేపథ్యంలో మరింత మంది వైద్యులను నియమించాలని, యంత్రాలకు మరమ్మతులు చేయించాలని పేషెంట్లు కోరుతున్నారు.

ఇక్కడ ప్రైవేట్ ఆసుపత్రుల్లో చికిత్స చేయించుకోలేని పేద రోగులే ఎక్కువగా వస్తుంటారు. ఈ విషయమై ప్రభుత్వం స్పందించాల్సిన అవసరం ఉందని బాధితులు అంటున్నారు.