చిత్తూరు జిల్లాలో ఒంటరి ఏనుగు బంధీ: 'ఆపరేషన్ టస్కర్' విజయవంతం

చిత్తూరు జిల్లా పలమనేరు అటవీ ప్రాంతంలో నెలల తరబడి సంచరిస్తున్న ఒంటరి ఏనుగును అటవీ శాఖ అధికారులు బంధించారు. కుంకి ఏనుగుల సాయంతో 'ఆపరేషన్ టస్కర్' ను విజయవంతంగా పూర్తి చేశారు.

గంటూరు, పెంగరగుంట, గుబ్బిళ్ల, కోటూరు గ్రామాల పరిసరాల్లో ఈ ఏనుగు తిరుగుతూ వ్యవసాయ పంటలను ధ్వంసం చేయడంతో పాటు గ్రామస్థులను భయభ్రాంతులకు గురి చేసింది. దీంతో రైతులు అటవీ శాఖకు ఫిర్యాదు చేశారు.

అటవీ శాఖ అధికారులు నిపుణుల పర్యవేక్షణలో ముందస్తు ప్రణాళికతో ఈ ఆపరేషన్ చేపట్టారు. డిప్యూటీ సీఎం పవన్ కల్యాణ్ సూచనలతో 'హనుమాన్' కార్యక్రమం కింద ఆపరేషన్ విజయవంతమైనట్లు అధికారులు తెలిపారు. ఏనుగును బంధించడంతో స్థానిక ప్రజలకు ఉపశమనం లభించింది.