ప్రకాశం జిల్లాలో యాదవ గొర్రెల కాపర్లపై దాడి; వీడియో సోషల్ మీడియాలో వైరల్

ప్రకాశం జిల్లా నాగులప్పాడు మండలం ఈదుమూడి గ్రామంలో జూన్ 7న యాదవ గొర్రెల కాపర్లపై దాడి జరిగింది. ఈ సంఘటన వీడియో సోషల్ మీడియాలో వైరల్ అయింది.

బాధితులు చినగంజం మండలం కొత్తగొల్లపాలెం గ్రామానికి చెందిన యాదవులు. ముఖ్యమంత్రి చంద్రబాబు నాయుడు P4 మోడల్ కింద ఈ గ్రామాన్ని దత్తత తీసుకున్నారు. గొర్రెల మేత కోసం ఈదుమూడి పరిధిలోకి వెళ్లిన యాదవులపై అక్కడి కొందరు వ్యక్తులు దాడి చేసినట్లు బాధితులు ఆరోపిస్తున్నారు. వీరిని కులం పేరుతో దూషించారని, చెప్పులతో కొట్టారని, తమ కుటుంబ సభ్యులను బెదిరించారని బాధితులు చెప్పారు. ఈ ఘటనలో మధు అనే యువకుడికి గాయాలయ్యాయి.

బాధిత యాదవుల ఫిర్యాదు మేరకు ఒంగోలు రూరల్ పోలీసులు ఎఫ్ఐఆర్ నంబర్ 57 నమోదు చేసి దర్యాప్తు ప్రారంభించారు. అదే సంఘటనపై తెలుగుదేశం పార్టీ నాయకులు అని చెప్పబడే మరో వర్గం కౌంటర్ ఫిర్యాదు చేసింది. పోలీసులు 58వ ఎఫ్ఐఆర్ నమోదు చేసి, యాదవులపై కూడా కొన్ని సెక్షన్ల కింద కేసు పెట్టారు. ఈ ఘటనలో పోలీసులు పక్షపాతం చూపారని, నిందితుల పక్షానే ఎఫ్ఐఆర్ నమోదు చేశారని యాదవ సంఘాలు ఆరోపిస్తున్నాయి. ఒంగోలు రూరల్ సిఐ శేషగిరిరావు, డిఎస్పీ శ్రీనివాసరావు రెడ్డి ఒకే కులానికి చెందినవారైనందున వారు నిందితులను రక్షిస్తున్నారని కొందరు విమర్శించారు.

ఈ నేపథ్యంలో యాదవ సామాజిక సంఘాల నాయకులు ఒంగోలు ఎస్పీ కార్యాలయం ముందు ధర్నా నిర్వహించారు. నిందితులపై కఠిన చర్యలు తీసుకోవాలనడంతో పాటు హత్యాయత్నం కేసు పెట్టాలని డిమాండ్ చేశారు. ఈ విషయంపై అధికారుల నుండి ఇప్పటివరకు అధికారిక స్పందన లేదు.

దాడికి కారణమైన వ్యక్తులు స్థానిక తెలుగుదేశం నాయకులని, వారంతా ముఖ్యమంత్రి, చీఫ్ సెక్రటరీ సాయి ప్రసాద్ లాగే ఒకే కులానికి చెందినవారని యాదవ నేతలు ఆరోపిస్తున్నారు. ఈ ఘటనపై బీసీ సంక్షేమ శాఖ మంత్రి సవిత, హోం మంత్రి అనిత స్పందించాలని వారు కోరారు.