విశాఖలో ఆయుష్మాన్ హాస్పిటల్‌లో 13 ఏళ్ల బాలిక మృతి; నిర్లక్ష్యమే కారణమని కుటుంబం ఆరోపణ

విశాఖపట్నంలోని ఆయుష్మాన్ ప్రైవేట్ హాస్పిటల్‌లో చెవి నుండి ద్రవం కారుతోందని చేరిన 13 ఏళ్ల బాలిక చికిత్స పొందుతూ మృతి చెందింది. సర్జరీకి సిద్ధం చేసే సమయంలో వైద్యులు ఇచ్చిన హెవీ డోస్ మత్తు ఇంజెక్షన్ కారణంగానే ఆమె చనిపోయిందని తల్లిదండ్రులు ఆరోపిస్తున్నారు.

నిన్న ఉదయం బాలికను చెవి నొప్పితో హాస్పిటల్‌లో చేర్పించారు. ఆమెకు చెవి సర్జరీ చేయాలని డాక్టర్లు నిర్ణయించారు. సర్జరీ గదికి తీసుకెళ్లిన కాసేపటికే ఆమెకు గుండె వేగం, బీపీ పెరిగాయని, దీంతో సర్జరీ నిలిపివేసి 24 గంటల పాటు అబ్జర్వేషన్‌లో ఉంచుతామని వైద్యులు తల్లిదండ్రులకు చెప్పారు. అయితే రాత్రి 2.10 నిమిషాలకు బాలిక చనిపోయిందని హాస్పిటల్ వర్గాలు తెలిపాయి.

చిన్న వయసు నుంచి ఆరోగ్యంగా ఉన్న తమ కుమార్తెకు వైద్యులు తీవ్ర నిర్లక్ష్యం చేశారని, మధ్యాహ్నం వరకు బాగానే ఉన్న అమ్మాయి ఎలా చనిపోయిందని తండ్రి కన్నీటి పర్యంతమయ్యారు. ఘటనపై టూ టౌన్ పోలీసులకు ఫిర్యాదు చేశామని కుటుంబ సభ్యులు తెలిపారు. హాస్పిటల్ ఎదుట బంధువులు ఆందోళన చేపట్టగా, పోలీసులు సంఘటన స్థలానికి చేరుకున్నారు. ఈ విషయంపై హాస్పిటల్ యాజమాన్యం స్పందన తెలియాల్సి ఉంది.