తెలంగాణకు 5 ఏళ్లలో ₹9,968 కోట్లు: 16వ ఆర్థిక సంఘం కేటాయింపు

16వ ఆర్థిక సంఘం తెలంగాణకు ₹9,968 కోట్లు కేటాయించింది. ఈ నిధులు 2026-27 నుంచి 2030-31 వరకు విడుదల అవుతాయి.

ఈ మొత్తాన్ని గ్రామ పంచాయతీలు, మండల, జిల్లా పరిషత్‌లలో ఖర్చు చేయాలని కేంద్రం నిర్దేశించింది. తాగునీటి సరఫరా, పారిశుద్ధ్యం, వ్యర్థాల నిర్వహణ, గ్రామీణ రహదారులు, వీధి దీపాలు వంటి మౌలిక సదుపాయాల కోసం ఈ నిధులు వినియోగించాలని పేర్కొంది. ఈ గ్రాంట్లను వేతనాలు, పెన్షన్ల చెల్లింపులకు ఉపయోగించరాదని స్పష్టం చేసింది.

ఏటా కేటాయింపులు ఇలా ఉన్నాయి: • 2026-27: ₹1,280 కోట్లు • 2027-28: ₹1,633 కోట్లు • 2028-29: ₹2,111 కోట్లు • 2029-30: ₹2,343 కోట్లు • 2030-31: ₹2,601 కోట్లు

నిధుల వినియోగంపై పారదర్శకత పాటించాలని కేంద్రం ఆదేశించింది. త్రైమాసిక, వార్షిక పురోగతి నివేదికలు కేంద్రానికి సమర్పించాలని తెలిపింది. నిధుల దుర్వినియోగం నిరూపితమైతే చట్టపరమైన చర్యలు తీసుకోవాలని రాష్ట్ర ప్రభుత్వాన్ని ఆదేశించింది.