హైదరాబాద్‌లో 25 టన్నుల కల్తీ మసాలాలు స్వాధీనం, ముగ్గురి అరెస్ట్

హైదరాబాద్‌లో హెచ్-ఫాస్ట్ అధికారులు కల్తీ మసాలాలపై భారీ ఆపరేషన్ నిర్వహించారు. 25 టన్నుల మసాలా దినుసులు, 89 టన్నుల ముడి సరుకును స్వాధీనం చేసుకుని ముగ్గురు నిందితులను అరెస్ట్ చేశారు.

హైదరాబాద్ సిటీ పోలీస్ కమిషనర్ సజ్జనార్ మీడియాకు వివరాలు వెల్లడించారు. ఈ మసాలాల్లో సింథటిక్ రంగులు, క్లాత్ డై, టాల్కం పౌడర్ వంటి ప్రమాదకర పదార్థాలు కలిపినట్లు గుర్తించామని తెలిపారు. ఆవాలు, వాము, జీలకర్ర, షాజీరా, లవంగాలు వంటి సాధారణంగా వంటల్లో వాడే దినుసులను ఇలా కల్తీ చేస్తున్నారని వివరించారు.

ఈ కల్తీ మసాలాలు తినడం వల్ల కాలేయం, మూత్రపిండాలపై తీవ్ర ప్రభావం పడుతుందని, ఇందులోని క్యాన్సరోజెనిక్ రసాయనాలు క్యాన్సర్‌కు దారితీస్తాయని సజ్జనార్ హెచ్చరించారు. అలాగే జీర్ణకోశ సమస్యలు, చర్మవ్యాధులు, నరాల వ్యవస్థపై ప్రభావం, రోగనిరోధక శక్తి క్షీణత వంటి అనారోగ్యాలకు కారణమవుతుందన్నారు.

ఇలాంటి కేసులపై త్వరలో ప్రత్యేక దర్యాప్తు బృందాన్ని (SIT) ఏర్పాటు చేస్తామని సజ్జనార్ ప్రకటించారు. నిందితులపై హత్యాయత్నం సెక్షన్ కింద కేసు నమోదు చేసినట్లు తెలిపారు. ప్రజారోగ్యానికి హాని కలిగించే వారిపై కఠిన చర్యలు తీసుకుంటామని హెచ్చరించారు.