76 ఏళ్ల వయసులోనూ 50 కిలోల గద తిప్పుతూ యువ రెజలర్లకు స్ఫూర్తిగా బీహార్ మల్ల యోధుడు

బీహార్ రాష్ట్రంలోని గయాకు చెందిన 76 ఏళ్ల మల్ల యోధుడు పండిత్ హీరానాథ్ మెహర్వార్ ప్రతిరోజు 40 నిమిషాలకు పైగా కఠిన వ్యాయామాలు చేస్తున్నారు. వయసు మీద పడినా ఆయన శరీర దారుఢ్యం, పట్టుదల చూసి యువ రెజలర్లు సైతం ఆశ్చర్యపోతున్నారు.

ఆయన ఒంటి చేత్తో 50 కిలోల బరువైన గదను అలవోకగా తిప్పుతూ, 100కు పైగా పుష్-అప్స్ చేస్తూ కుర్ర రెజలర్లకు సవాల్ విసురుతున్నారు. నిత్యం 40 నిమిషాలకు మించి ఇలా వ్యాయామం చేయడం ఆయన దినచర్యలో భాగం.

గయాలోని విష్ణుపద ఘాట్ సమీపంలో ఉన్న సంగత్ ఘాట్ అఖాడాలో ఈయన గురువుగా వ్యవహరిస్తున్నారు. 150 ఏళ్ల చరిత్ర కలిగిన ఈ అఖాడాలో దాదాపు 69 ఏళ్లుగా మల్ల యుద్ధ సంప్రదాయాన్ని కొనసాగిస్తున్నట్లు ఆయన తెలిపారు. తాను స్వయంగా రెజలర్‌గా రాణించడమే కాకుండా వందలాది మందికి శిక్షణ ఇచ్చారు.

హీరానాథ్ మార్గదర్శనంలో ఈ అఖాడా అనేక మంది జాతీయ, అంతర్జాతీయ స్థాయి రెజలర్లను తయారు చేసింది. అంతర్జాతీయ రెజలర్ సందీప్ కుమార్ పాఠక్, జాతీయ రెజలర్ రితీక్ సింగ్ వంటి ప్రతిభావంతులు ఇక్కడే శిక్షణ పొందారు.

76 ఏళ్ల వయసులో ఇంత కఠిన వ్యాయామాలు వద్దని వైద్యులు సూచించినా, హీరానాథ్ మాత్రం ఏమాత్రం అలసట లేకుండా కసరత్తులు చేస్తున్నారు. వ్యాయామమే తన ఆరోగ్యానికి మూలమని, అది తనకు పూర్వీకులు ఇచ్చిన అమూల్య వారసత్వమని ఆయన చెబుతున్నారు.

గతంలో గయాలో 40కి పైగా అఖాడాలు ఉండేవని, ప్రస్తుతం చాలావరకు మూతపడ్డాయని హీరానాథ్ ఆవేదన వ్యక్తం చేశారు. యువత జిమ్‌ల వైపు మొగ్గు చూపుతుండటంతో సంప్రదాయ మట్టి కుస్తీ కనుమరుగవుతోందన్నారు. భారతీయ సంస్కృతిలో భాగమైన ఈ క్రీడను కాపాడేందుకు, దేశానికి మంచి మల్ల యోధులను తయారు చేసేందుకు ప్రభుత్వం సహాయం అందించాలని ఆయన విజ్ఞప్తి చేశారు.