8వ తరగతి విద్యార్థి పాత సైకిల్‌తో స్క్రాప్ ఇంజన్‌తో బైక్ తయారీ

కొల్హాపూర్ జిల్లా కెర్లీ గ్రామానికి చెందిన 8వ తరగతి విద్యార్థి సమర్థ్ పాత సైకిల్ విడిభాగాలు, స్క్రాప్ ఇంజన్ ఉపయోగించి ఒక ద్విచక్ర వాహనాన్ని తయారు చేశాడు.

చిన్నప్పటి నుండి కొత్త వస్తువులను రూపొందించడంలో ఆసక్తి ఉన్న సమర్థ్‌కు తండ్రి ప్రోత్సాహంతో ఇంట్లోనే ఒక చిన్న గ్యారేజ్ ఏర్పాటు చేసుకున్నాడు. మొదట్లో ఒక చిన్న ట్రాక్టర్ లేదా నాలుగు చక్రాల వాహనాన్ని తయారు చేయాలనుకున్న సమర్థ్ తర్వాత ద్విచక్ర వాహనం వైపు మళ్లాడు.

ఈ వాహనం రూపకల్పన కోసం YouTube ట్యుటోరియల్స్ మరియు ఆర్టిఫిషియల్ ఇంటెలిజెన్స్ సాయం తీసుకున్నట్లు తెలిపాడు. సమర్థ్ తయారు చేసిన ఈ సైకిల్-బైక్ ప్రస్తుతం సోషల్ మీడియాలో చక్కర్లు కొడుతోంది.

తండ్రి మాట్లాడుతూ తన కుమారుడు పరిమిత వనరులతో ఇటువంటి ప్రయోగాలు చేయడం సంతోషంగా ఉందని చెప్పారు. సమర్థ్ భవిష్యత్తులో మరిన్ని ప్రయోగాలు చేపట్టాలని ఆసక్తి చూపుతున్నాడు.