ఆడి కృత్తిక: సుబ్రహ్మణ్య స్వామికి కావడి మొక్కులు, విశేష పూజలు

ప్రతి సంవత్సరం తమిళనాడులోని ప్రసిద్ధ సుబ్రహ్మణ్య స్వామి దేవాలయాలలో ఆడి కృత్తిక పర్వదినాన్ని ఘనంగా నిర్వహిస్తారు. ఈ రోజున భక్తులు స్వామి వారికి రకరకాల కావడి మొక్కులు సమర్పిస్తారు.

పాల కావడి, పూల కావడి, పన్నీరు కావడి, గంధం కావడి వంటి మొక్కులతో పాటు అగ్ని కావడి మొక్కు ప్రత్యేకత సంతరించుకుంటుంది. కోరిన మొక్కు నెరవేరిన తర్వాత నిప్పుల గుండం మీద కావడి మోస్తూ నడిచి స్వామికి మొక్కు చెల్లించడం ఆనవాయితీ.

పురాణాల ప్రకారం సుబ్రహ్మణ్య స్వామి సూరపద్మాసురుడిని సంహరించిన సందర్భాన్ని పురస్కరించుకుని ఈ కావడి ఉత్సవం మొదలైందని స్థల పురాణాలు చెబుతున్నాయి.

జ్యోతిష శాస్త్రంలో పేర్కొన్న కాలసర్ప దోషం, రాహు-కేతు దోషాలు, కుజ దోషం వంటి గ్రహదోషాల తీవ్రత తగ్గించుకోవడానికి ఈ రోజు సుబ్రహ్మణ్య స్వామికి ప్రత్యేక పూజలు చేయడం భక్తుల సంప్రదాయం. “ఓం చంగల్వనాథాయ నమః” అనే మంత్రాన్ని 21, 54 లేదా 108 సార్లు జపించడం వల్ల స్వామి అనుగ్రహం లభిస్తుందని నమ్ముతారు.

సుబ్రహ్మణ్య ఆలయంలో ప్రదక్షిణలు, ఆవు పాలతో అభిషేకం నిర్వహించడం, స్వామి మంత్రాలు పఠించడం వంటి ఆచారాలు ఈ పర్వదినాన ప్రాముఖ్యత పొందుతాయి.