రాజోలులో వర్షపు నీటితో పోలింగ్ బూత్‌లు మునిగాయి.. కొన్ని కేంద్రాల్లో పోలింగ్ వాయిదా

కోనసీమ జిల్లా రాజోలు నియోజకవర్గంలో భారీ వర్షాల వల్ల పలు పోలింగ్ కేంద్రాలు నీట మునిగాయి. దీంతో MPTC, ZPTC ఎన్నికల పోలింగ్‌లో ఓటర్లు ఇబ్బందులు ఎదుర్కొంటున్నారు.

రాజోలు మండలంలోని పలు బూత్‌లలో వర్షపు నీరు నిలిచింది. వృద్ధులు, వికలాంగులు పోలింగ్ కేంద్రాలకు చేరుకోవడానికి తీవ్ర ఇబ్బందులు పడుతున్నారు. సుదూర ప్రాంతాల నుంచి వచ్చే ఓటర్లు కూడా నీటిలో నడిచి వెళ్లాల్సిన పరిస్థితి ఏర్పడింది. రాజోలుతో పాటు పి. గన్నవరం, అమలాపురం పరిసర ప్రాంతాల్లోనూ కొన్ని కేంద్రాల వద్ద ఇదే పరిస్థితి కనిపించింది.

నీరు ఎక్కువగా నిలిచిన రెండు-మూడు పోలింగ్ కేంద్రాల్లో ఈరోజు పోలింగ్ వాయిదా వేశారు. ఆ కేంద్రాల్లో రెండు-మూడు రోజుల తర్వాత మళ్లీ పోలింగ్ నిర్వహించనున్నారు.

ఉమ్మడి తూర్పు గోదావరి జిల్లా పరిధిలోని కాకినాడ, తూర్పు గోదావరి, అంబేద్కర్ కోనసీమ, పోలవరం జిల్లాల్లో ఉదయం 7 గంటల నుంచి పోలింగ్ ప్రారంభమైంది. ఈ ప్రాంతాల్లో పోలింగ్ ప్రశాంతంగా సాగుతున్నట్టు సమాచారం. కాకినాడ జిల్లాలో 20, అంబేద్కర్ కోనసీమలో 19, తూర్పు గోదావరిలో 21, పోలవరంలో 14 ZPTC స్థానాలకు ఎన్నిక జరుగుతోంది. ఏజెన్సీ ప్రాంతంలోని ఏడు మండలాల్లో ఉదయం 7 నుంచి మధ్యాహ్నం 3 గంటల వరకు పోలింగ్ ఉంటుంది.

ప్రతి పోలింగ్ కేంద్రం వద్ద మెడికల్ క్యాంపులు, హెల్ప్ డెస్క్‌లు ఏర్పాటు చేశారు. పోలీసు బందోబస్తు, వెబ్‌కాస్టింగ్, మైక్రో అబ్జర్వర్లతో పోలింగ్‌ను పర్యవేక్షిస్తున్నారు. ఓటర్లు ప్రభుత్వం గుర్తించిన 20 గుర్తింపు కార్డుల్లో ఏదో ఒకటి చూపిస్తే సరిపోతుంది.