ఏపీలో ఎంపీటీసీ, జెడ్పీటీసీ పోలింగ్ ప్రారంభం; కొన్ని మండలాల్లో వాయిదా

ఆంధ్రప్రదేశ్‌లో ఎంపీటీసీ, జెడ్పీటీసీ ఎన్నికల పోలింగ్ ఉదయం 7 గంటలకు ప్రారంభం కానుంది. 28 జిల్లాల్లో 582 జెడ్పీటీసీ స్థానాలు, 7,767 ఎంపీటీసీ స్థానాలకు పోలింగ్ జరగనుంది. మొత్తం 31,460 పోలింగ్ కేంద్రాలు ఏర్పాటు చేయగా, 2,61,52,377 మంది ఓటర్లు ఓటు వేయనున్నారు.

659 మండలాల్లో జెడ్పీటీసీ ఎన్నికల నోటిఫికేషన్ జారీ అయింది. వీటిలో 77 మండలాల్లో ఎన్నిక ఏకగ్రీవమైంది. మిగిలిన 582 మండలాల్లో 2,169 మంది అభ్యర్థులు పోటీలో ఉన్నారు. ఎంపీటీసీలో 9,821 స్థానాలకు గాను 251 స్థానాలు ఏకగ్రీవమయ్యాయి. మూడు చోట్ల నామినేషన్లు దాఖలు కాలేదు. మిగిలిన 7,767 స్థానాలకు 18,843 మంది పోటీపడుతున్నారు. మొత్తం 20,966 మంది అభ్యర్థులు బరిలో ఉన్నారు.

ఎన్నికల కమిషన్ సమస్యాత్మక, అత్యంత సమస్యాత్మక ప్రాంతాలను గుర్తించింది. ఆ ప్రాంతాల్లో సీసీ కెమెరాలు, వెబ్‌కాస్టింగ్ ఏర్పాటు చేసినట్లు తెలిపింది. పోలింగ్ నిర్వహణలో 49,121 మంది సిబ్బంది, బందోబస్తు కోసం 40,769 మంది పోలీసులు పాల్గొంటారు.

భారీ వర్షాలు, వరదల కారణంగా ఏలూరు జిల్లాలో వేలేరుపాడు, ముట్టాయిగూడెం, జిరుగుమిల్లి, పోలవరం మండలాల్లో పోలింగ్ వాయిదా పడింది. కోయలగూడెం మండలంలో మాత్రం ఎన్నికలు యథావిధిగా జరుగుతాయని ఎన్నికల కమిషన్ తెలిపింది. తూర్పు గోదావరి జిల్లాలో గోపాలపురం మండలంలో ఫ్లాష్ వరదల కారణంగా 1 జెడ్పీటీసీ, 18 ఎంపీటీసీ స్థానాల ఎన్నిక వాయిదా పడింది.

అల్లూరి సీతారామరాజు, పోలవరం జిల్లాల్లోని కొన్ని సమస్యాత్మక ప్రాంతాల్లో ఉదయం 7 నుంచి మధ్యాహ్నం 3 గంటల వరకే పోలింగ్ జరుగుతుంది. మిగిలిన ప్రాంతాల్లో సాయంత్రం 5 గంటల వరకు పోలింగ్ కొనసాగుతుంది. విశాఖపట్నం జిల్లాలో 4 జెడ్పీటీసీ, 53 ఎంపీటీసీ స్థానాలకు; అనకాపల్లిలో 24 జెడ్పీటీసీ, 425 ఎంపీటీసీ స్థానాలకు; అల్లూరి జిల్లాలో 11 జెడ్పీటీసీ, 172 ఎంపీటీసీ స్థానాలకు ఎన్నికలు జరుగుతున్నాయి. ఎన్నికలు శాంతియుతంగా, పారదర్శకంగా జరిగేందుకు ఏర్పాట్లు చేసినట్లు అధికారులు తెలిపారు.