సంగారెడ్డి కందిలో ప్యూర్ ఈవీ కంపెనీలో భారీ అగ్నిప్రమాదం

సంగారెడ్డి జిల్లా కంది మండలంలోని Pure EV ఎలక్ట్రిక్ స్కూటీ తయారీ కంపెనీలో భారీ అగ్నిప్రమాదం జరిగింది. తెల్లవారుజామున మొదలైన మంటలు ఉదయం వరకు కొనసాగుతూనే ఉన్నాయి. కంపెనీ ప్రాంతమంతా దట్టమైన పొగ వ్యాపించింది.

మంటలను ఆర్పేందుకు మూడు ఫైర్ ఇంజన్లను రంగంలోకి దించారు. కంపెనీలోని బ్యాటరీలు మంటలు పెట్టుకోవడంతో ఫైర్ సిబ్బంది ఆర్పివేయడంలో ఇబ్బంది పడుతున్నారు. మరిన్ని ఫైర్ ఇంజన్లను తీసుకొచ్చేందుకు ఏర్పాట్లు చేస్తున్నారు.

కంపెనీ IIT సమీపంలో ఉంది. దాని చుట్టూ అనేక నివాస గృహాలు ఉన్నాయి. కంది మండల కేంద్రం, సంగారెడ్డి జిల్లా కేంద్రానికి కూడా ఇది దగ్గరగా ఉంది. దట్టమైన పొగ వల్ల స్థానిక నివాసితులు ఆందోళన చెందుతున్నారు.

గతంలోనూ ఈ కంపెనీలో పలుసార్లు అగ్నిప్రమాదాలు జరిగాయి. నాణ్యత లేని బ్యాటరీలు పేలుతున్నాయని ఆరోపిస్తూ కస్టమర్లు కంపెనీ ముందు నిరసనలు చేపట్టారు. ఈ ఆరోపణలపై కంపెనీ తరఫున స్పందన లభ్యం కాలేదు.

ఘటనా స్థలంలో వీడియో చిత్రీకరణను అడ్డుకున్నట్టు మీడియా కార్యకర్తలు ఆరోపించారు. ఈ ప్రమాదంలో ప్రాణనష్టం లేదా గాయాలపై ఇప్పటివరకు సమాచారం లభ్యం కాలేదు. మంటలను ఆర్పే పనులు కొనసాగుతున్నాయి.