ఎల్ నినో ప్రభావం: కూరగాయల సరఫరాలో 10-20% కోత, ధరలు పెరుగుదల

ఎల్ నినో ప్రభావం, వర్షాల లోటుతో కూరగాయల దిగుబడి తగ్గింది. దీంతో మార్కెట్లకు సరఫరా 10 నుంచి 20 శాతం తగ్గిందని అంచనా వేస్తున్నారు.

సరఫరా తగ్గడంతో బయటి మార్కెట్లలో కూరగాయల ధరలు పెరుగుతున్నాయి. టమాటా, వంకాయ, బెండకాయ రాక తగ్గిందని మార్కెట్ నిర్వాహకులు చెబుతున్నారు.

హైదరాబాద్ ఎర్రగడ్డ రైతు బజారుకు సిద్దిపేట, గజ్వేల్, మెదక్, వికారాబాద్, హైదరాబాద్ పరిసర ప్రాంతాల నుంచి కూరగాయలు వస్తున్నాయి. ఇక్కడ బోర్డు రేట్లకే అమ్మాలని అధికారులు నిబంధన విధించారు. ఎక్కువ ధరకు అమ్మిన వారిపై జరిమానాలు విధిస్తున్నారు.

ఎర్రగడ్డ రైతు బజారులో టమాటా ₹27 (గరిష్ఠ ధర ₹55), వంకాయ ₹18, బెండకాయ ₹45, క్యాప్సికం ₹47, బీన్స్ ₹55, క్యాబేజ్ ₹13 ఉన్నాయి.

బోర్డు రేట్లకే అమ్ముతున్నారని, ఒక్క రూపాయి కూడా ఎక్కువ తీసుకోవడం లేదని వినియోగదారులు చెబుతున్నారు. ₹300 ఖర్చు చేస్తే ఇంటికి అవసరమైన అనేక రకాల కూరగాయలు కొనుగోలు చేయవచ్చని వారు చెప్తున్నారు. కాకరకాయ కిలో ₹30కి దొరుకుతుండగా, బయట మార్కెట్లో ₹60 నుంచి ₹70 ఉందని వారు తెలిపారు.

మరోవైపు రైతులు ఇబ్బందులు పడుతున్నారు. వర్షాలు లేక పంటలు ఎండిపోతున్నాయని వారు చెబుతున్నారు. రోజుకు ఎనిమిది గంటలు మాత్రమే విద్యుత్ సరఫరా ఉండటంతో బోర్ల ద్వారా నీరు అందించలేకపోతున్నామని చెబుతున్నారు. పెట్టుబడి ఖర్చులు పెరిగి దిగుబడులు తగ్గడంతో నష్టాలు తప్పడం లేదని రైతులు చెబుతున్నారు.

రైతుకు గిట్టుబాటు ధర, వినియోగదారుడికి అందుబాటు ధర లభించేలా ప్రభుత్వం చర్యలు చేపట్టాలని ప్రజలు కోరుతున్నారు.