ఆద్యకల మ్యూజియం ఏర్పాటుపై జాప్యంపై కమిటీ ఆందోళన, ప్రభుత్వంపై ఒత్తిడి

ఆద్యకల పరిరక్షణ కమిటీ హైదరాబాద్‌లో సమావేశమై, ఆద్యకల మ్యూజియం ఏర్పాటు విషయంలో ప్రభుత్వం జాప్యం చేయడంపై అసంతృప్తి వ్యక్తం చేసింది.

సమావేశంలో రిటైర్డ్ జడ్జి జస్టిస్ సుదర్శన్ రెడ్డి, జానపద పరిశోధకుడు జయధీర్ తిరుమలరావు, సామాజిక కార్యకర్త సజయతో పాటు పలువురు మేధావులు, రచయితలు పాల్గొన్నారు. ముఖ్యమంత్రి రేవంత్ రెడ్డి ఇంతకుముందు ఈ మ్యూజియం ఏర్పాటుకు ఆమోదం తెలిపి, స్థలం ఇస్తామని హామీ ఇచ్చినా, అమలు కావటం లేదని వారు ప్రశ్నించారు.

ఆద్యకల మ్యూజియం వ్యక్తిగత ఆస్తి కాదని, అది ప్రజల సాంస్కృతిక వారసత్వమని జస్టిస్ సుదర్శన్ రెడ్డి అన్నారు. ప్రభుత్వం ఇచ్చిన హామీని నిలబెట్టుకుని మ్యూజియం ఏర్పాటు ప్రక్రియను వేగవంతం చేయాలని వక్తలు కోరారు. గత ప్రభుత్వాలు రెండు పర్యాయాలు ఈ విషయంలో సహాయం చేయలేదని, ప్రస్తుత ప్రభుత్వం సానుకూలంగా స్పందించిందని కమిటీ సభ్యులు పేర్కొన్నారు.

ముఖ్యమంత్రి రేవంత్ రెడ్డి కళాకారుల నేపథ్యం నుండి వచ్చినవారని, ఆయన స్వయంగా మ్యూజియం రూపకల్పనపై వివరంగా మాట్లాడారని, కానీ ఇప్పుడు కార్యరూపం దాల్చడంలో ఆలస్యం జరుగుతోందని కమిటీ వెల్లడించింది. రెవెన్యూ శాఖ, విద్యాశాఖ మంత్రులు, అధికారుల స్థాయిలో కొన్ని చర్యలు జరిగినా, తుది నిర్ణయం తీసుకోలేదని తెలిపారు. ప్రభుత్వం నుంచి స్పష్టమైన సమాచారం లేదని, తాము మళ్లీ ముఖ్యమంత్రిని కలిసేందుకు ప్రయత్నిస్తున్నామని చెప్పారు.