ఒంగోలు టౌన్ ప్లానింగ్ ఉద్యోగుల ఇళ్లలో ACB సోదాలు, 20 గంటల దాడుల్లో కీలక పత్రాలు స్వాధీనం

ఒంగోలు మున్సిపల్ కార్పొరేషన్ టౌన్ ప్లానింగ్ విభాగంలో పనిచేసే 13 మంది ఉద్యోగుల ఇళ్లలో ఏసీబీ అధికారులు ఏకకాలంలో సోదాలు నిర్వహించారు.

ఈ దాడులు నిన్న తెల్లవారుజాము నుంచి అర్ధరాత్రి వరకు దాదాపు 20 గంటల పాటు కొనసాగాయి. ఈ సందర్భంగా ఆ ఉద్యోగుల ఇళ్ల నుంచి కీలక డాక్యుమెంట్‌లు, మొబైల్ ఫోన్లు, లాప్‌టాప్‌లను ఏసీబీ స్వాధీనం చేసుకుంది.

ఇళ్లు, షాపింగ్ మాల్స్ నిర్మాణాలకు అనుమతులు మంజూరు చేయడంలో అవకతవకలు జరిగాయనే ఫిర్యాదులతో ఈ సోదాలు చేపట్టారు. గత మార్చిలో ఇదే విభాగంలో బీపీఎస్ (భవన క్రమబద్ధీకరణ) కింద జరిగిన అవినీతి ఆరోపణలపై ఏసీబీ కార్యాలయంలో చేసిన దాడుల్లో కొంతమంది ఉద్యోగులు ఫోన్‌పే ద్వారా బాధితుల నుంచి డబ్బులు తీసుకున్నట్లు ఆధారాలు లభించాయి.

ఆ దర్యాప్తు ప్రకారం ఈ 13 మంది ఉద్యోగులు అవినీతికి పాల్పడ్డారని ఏసీబీ నిర్ధారించింది. ఇటీవల చేపట్టిన ఈ ఇళ్ల సోదాల్లో స్వాధీనం చేసుకున్న బ్యాంకింగ్ డేటా, ఫోన్లు, లాప్‌టాప్‌లను విశ్లేషిస్తున్నట్లు అధికారులు తెలిపారు. విచారణ పూర్తయ్యాక తదుపరి చర్యలు తీసుకుంటామని వారు పేర్కొన్నారు.