చివరి వ్యక్తికి భూమి పట్టా ఇచ్చే వరకు ఆగేది లేదు: కలిదిండిలో చంద్రబాబు

ఏపీ ముఖ్యమంత్రి చంద్రబాబు నాయుడు కలిదిండి పర్యటనలో భూ సంస్కరణలపై మాట్లాడారు. 1986 నాటి లెగసీ రికార్డుల నుంచి అన్ని రకాల భూ పత్రాలను డిజిటల్ చేస్తున్నామని, బ్లాక్‌చెయిన్‌లో భద్రపరుస్తున్నామని తెలిపారు.

ఇప్పటికే 68 లక్షల మందికి భూ పట్టాలు జారీ చేశామని, లక్ష్యం ఒక కోటికి ఇవ్వడమేనని చెప్పారు. ఆటో మ్యుటేషన్‌ ద్వారా 9 లక్షల మందికి వెంటనే అందించామన్నారు. కుటుంబంలో వారసత్వంగా భూమి బదిలీ చేసుకుంటే రూ.10 లక్షల వరకు రూ.100, ఆపై రూ.1000 ఛార్జీ మాత్రమే ఉంటుందని వివరించారు.

ఈ కార్యక్రమాన్ని అవినీతి రహితంగా చేయడానికి ఇ-కేవైసీ, స్వయంగా సర్వే, ప్రూఫ్ ఆఫ్ కాన్సెప్ట్ ద్వారా యజమాని సంతకం తీసుకున్న తర్వాతే పుస్తకం ప్రింట్ చేస్తున్నామని, గ్రామ సభల్లో బహిరంగంగా పట్టాలు పంచి పెడతామని తెలిపారు. భూమి సమస్యలతో ఆస్తి ఉన్నా అమ్ముకోలేక, పెళ్లిళ్లు చేయలేక ఇబ్బంది పడినవారి ఆనందం చూసి తన జీవితం సార్థకమైందని చంద్రబాబు అన్నారు.

ఈ కార్యక్రమం చివరి వ్యక్తికీ న్యాయం జరిగే వరకు ఆగేది లేదని, పనిచేసిన అధికారులు సత్యప్రసాద్, సాయిప్రసాద్ లను ఆపేది లేదని స్పష్టం చేశారు.