జలమండలి GM అనంత లక్ష్మి కుమార్‌ను ACB అదుపులోకి తీసుకున్న అధికారులు

ఆదాయానికి మించిన ఆస్తుల కేసులో హైదరాబాద్ జలమండలి GM అనంత లక్ష్మి కుమార్‌ను ACB అధికారులు అదుపులోకి తీసుకున్నారు.

ఈరోజు ఉదయం 6 గంటలకు సోదాలు మొదలయ్యాయి. ఒకేసారి 8 ప్రాంతాలలో ACB అధికారులు సోదాలు నిర్వహించారు. అతని నివాసం, సన్నిహితుల నివాసాలు, కుటుంబ సభ్యుల ఇళ్లలో కూడా సోదాలు జరిగాయి.

నిజామాబాద్, సంగారెడ్డి జిల్లాల్లో 18 ఎకరాల వ్యవసాయ భూమి అధికారులు గుర్తించారు. హైదరాబాద్‌లో 6 ప్లాట్లు, మరో 3 ప్లాట్లు, ఒక ఇల్లు పత్రాలు జప్తు చేశారు.

సోదాల్లో ₹1 కోటి లక్షల నగదు స్వాధీనం చేసుకున్నారు. 2.1 కిలోల బంగారు ఆభరణాలు, 9.2 కిలోల వెండి వస్తువులు, ఒక కారు, బజాజ్ బైక్ కూడా స్వాధీనం చేసుకున్నారు. ఇప్పటి వరకు గుర్తించిన మొత్తం ఆస్తుల విలువ దాదాపు ₹5.88 కోట్లు. బహిరంగ మార్కెట్‌లో ఈ విలువ ఇంకా ఎక్కువగా ఉంటుందని అధికారులు అభిప్రాయపడుతున్నారు.

సోదాలు రాత్రి వరకు కొనసాగే అవకాశం ఉంది. బ్యాంకు ఖాతాలు, లాకర్లు కూడా తనిఖీ చేస్తున్నారు. అనంత లక్ష్మి కుమార్ జీతభత్యాలు, ఖర్చులు వివరాలు కూడా అధికారులు సేకరిస్తున్నారు. సోదాల అనంతరం అరెస్టు చేసి రిమాండ్‌కు తరలించే అవకాశం ఉందని తెలుస్తోంది.